Box Office Wonder Woman 1984-in kar hnih chhung ro a rel ta
US Box Office-ah kar liam ta kartawpah khan Wonder Woman 1984-in ro a rel leh a, a zawnin kar hnih chhung sum lalut tam ber a ni tawh. Theatre-a kal kher ngai loin HBO Max lamah Krismas present tana chhawp chhuak tho mah se US-ah chuan sum lalut tam ber a la ni a, a sum lakluh zat erawh film siamtute duh aiin a tlem daih ang tih a rin thiam theih, hri a leng miau a!
China-ah a sum lakluh a tlahniam nasa
Wonder Woman 1984 hian kar tawp liam taah khan North America Box Office-ah $5,500,000 a lalut a, kar hmasa lama a lakluh nen $28,500,000 a lalut tawh.
Ram dang aṭangin $89,700,000 lalut tawh bawkin khawvel puma a sum lakluh tawh chu $118,200,000 a tling tawh a ni. Hetihlai hian China Box Office-ah chuan tlangzarh kar aiin a kar hnihnaah a sum lakluh 92% laiin a tlahniam.
China-ah hian tlangzarh karah khan $mtd 18.8 a lalut phak a, tun kar tawp liam taah erawh kha chuan $mtd 1.5 chiah a lalut.
Wonder Woman 1984 hi $mtd 200 vel senga siam a ni a, an sum sen zat hmu chhuak tur erawh hi chuan an la thawhrim a ngai dawn hle niin a lang. Hripui leng kara budget lian tham film an tlangzarh ngam tlemte zinga mi a ni a, film siamtu lam pawhin beisei nei sang lutukin an tlangzarh a rinawm lo.
Sonic the Hedgehog pahnihna a ni
Nikum kum tir lama tlangzarh Sonic the Hedgehog chu Box Office-ah rawn invawrh lehin pahnihna a ni a, $3,220,753 lai a rawn lalut leh. He film hian khawvel pumah sum $313,578,051 lai a lalut tawh a, North America Box Office aṭang ringawt pawhin $148,974,665 lai a lalut tawh a ni.
Theatre an hawng tam hret
Kar tawp liam taah khan kar dang aiin theatre an hawng tam hret niin a lang a, sum lalut tam zual pasarihte hi theatre sang chuangah an pe chhuak vek. Hetihlai hian ngai awh erawh an la hlat hle a, boruak pangngaiah chuan theatre sang li chuang an hawng tlangpui a ni.
The Croods: A New Age chu pathumna a ni a, Tom Hanks channa chart hmasa lama pahnihna News of the World chu palinaah a tla thla thung. Monster Hunter chu pangana ani bawk a, Top 5 chian hian $maktaduai chuang sum an lalut.
Box Office top 10
1 Wonder Woman 1984 $5,500,000
2 Sonic the Hedgehog $3,220,753
3 The Croods: A New Age $2,224,435
4 News of the World $1,690,180
5 Monster Hunter $1,263,978
6 Fatale $701,561
7 Promising Young Woman $687,900
8 Pinocchio $288,208
9 The War with Grandpa $112,835
10 Alien (2020 Re-release) $75,000