Esports World Cup 2025 hmawr bawk a ni ta

Saudi Arabia khawpui, Riayadh-a video games hrang hrang hmanga in elna lian, Esport World Cup 2025 neih chu Pathianni zan, August 24 khan a hmawr bawk a ni ta. A tawp zanah hian games huanga games ngaihhlut hlawh ber pawl, Counter Strike 2 (CS2) hmanga in elna buatsaih niin The MongolZ an champion.

EWC-ah hian esports huanga games hrang hrang 25-ah in elna neih a ni a, solo leh team hmanga khelh chiah te in elna hi neih a ni. Player 2000 chuang telin, in elna hrang hranga lawmman belh khawm prize pool hi USD 70,000,000 a tling.

In elna 25 awm zingah Apex Legend, League of Legend, leh Honor of Kings te chu prize pool tamna niin USD mtd 3 ṭheuh lawmmanah sem chhuah a ni.

EWC 2025 ah hian inelna ngaihven hlawh, Mobile Legend: Bang Bang (MLBB) chuan entu ngah ber record a siam a, MLBB-ah hian Team Liquid an champion. Chess-ah world No.1 Magnus Carlsen-in pakhatna a la, Apex Legend Global Series-ah VK Gaming an champion bawk. Dota 2-ah Team Spirit- champion-in, Free Fire-ah Evos Esports an champion bawk a, PUBG Mobile-ah Yangoon Galacticos champion-in PUBG Battleground zawkah erawh Twisted Minds an champion thung.