Bible chang ngaihthlak theihna HUM Audio Bible App

BSI Mizo Bible hi i duh phawt chuan i phone-ah khan engtik lai pawhin a ngaihthlak theih ta. I phone-ah khan play store-ah lut la, HUM Audio Bible App kha install la, i hnathawh pah emaw, lirthei i khalh pah emaw pawhin eng hunah pawh BSI Mizo Bible chang i duh lai lai kha i ngaithla thei ang.

HUM Audio Bible App hi nikum April-a an tlangzarh daih tawh kha a ni a, Android leh Apple-ah a hman theih ve ve a ni. Ṭawng hrang hrang 54 laiin Bible chang hi a ngaihthlak theih a, ziak leh chhiar thiam lo tan phei chuan a ṭangkai hle ang. Tlangzarh a nih tirhah kha chuan Mizo ṭawngin a ngaihthlak theih loha, tunah erawh Bible Society of India nen thawkdunin Mizo ṭawng ngeiin Bible chang a ngaihthlak theih tawh.

He Bible App hi a thlawnin a download theih a, nakinah phei chuan Pathian fakna hla hrang hrang ngaihthlak theihin dah tel an la tum. Duh chuan offline pawhin a hman theih a, kan duh lai bung leh chang a bookmark theih bakah Bible changa kan hriatfiah loh lai zawh fiah theihna te pawh a awm a ni. Bible chang hriat thiam loh lai inei a nih chuan he application kaltlang hian message-in emaw audio record-in emaw a thawn theih a, chu chu HUM team lam hian an lo chhang mai dawn che a ni. Chumai chu a la ni lo a, tunhnaiah khan sermon, podcast leh hla ṭhankhat an dah tel tawh bawk.