Zothan Autoworks-in kum 10 tlin an lawm

Tata Motors commercial vehicle dealer, Zothan Autoworks chuan thawhṭanni khan Aijal Club Park-ah kum 10 tlin an lawm.

Zothan Autoworks hi August 25, 2015-ah hawn a ni a, September 9 aṭangin Mizoramah sumdawnna lirthei an hralh chhuak a; kum 10 an tlin rualin 7,019 an hralh. Managing Director Zothantluanga chuan, Pathian hruaina avanga kum 10 tling thei an ni tiin, anmahni dawrtu leh puitute chungah lawmthu a sawi. A tirah hnathawk mi 40 awmin tunah mi 115 an chhawr mek a, chawhrualin thla tin sumdawnna lirthei 58 chuang hret hralh ziah ang an ni.

February 2021 kha thla khat chhunga lirthei an hralh tam ber niin 186 an hralh chhuak. Sale office, Bawngkawnah neiin Phunchawngah Service Station an kalpui a; Lunglei, Lawngtlai, Siaha, Champhai leh Kolasib ah branch hawng tawhin Tata OK a hranin an nei tel bawk.

Lirthei an hralh tawh zingah Rs nuai 5.60 man Ace Gold (petrol) a tlawm ber a, Rs nuai 70.45 chuang man Signa 4830 a to ber thung. Anmahni dawrtute zinga mi vannei 10 thlang chhuakin August 25 aṭanga thla ruk chhungin vawi khat a thlawnin lirthei an siamsak dawn a, Rs 50,000 man thleng a huam ang.