Bethsy, Pensy leh Temi Sailo Mamawh chhannain kan mamawh a la chhang

A ṭum hnihna turin Bethsy, Pensy leh Temi Sailo te hla 'Mamawh chhanna Lal Isua' chu Rain­bow Ṭhazual Faknaah pakhatna a hauh leh a, mimal pawha pa­khatna hauh thei ṭhiau khawpa zai­thiam pathumte zai hi fakna hlaah chuan Mizo mipuiina kan duh ber a la ni rih.

'Mamawh chhanna Lal Isua' hla hi May 5 aṭang khan Ṭha­zualah hian kan hmu ṭan a, palinaah bul a rawn ṭan a, bul ṭan ṭha berte zinga mi a ni. June 8 khan pathumna a kai a, June 22 khan pakhatnaah a awm ta a, tun thlengin pakhatna hi a la luah a ni. He hla phuahtu hi C. Lalruatkima (Cee-a) a ni a, Hannah Audio & Sound, Serkawn-in an produce a ni. A phuahtu, Cee-a hi Temi Sailo hla hit 'Kraws thu' phuahtu tho kha a ni.

Temi Sailo chuan, "Cee-a hian an kohhran anniversary atan a tirah tak chuan a phuah a, a hnuah a version siam danglamin, kei leh ka ṭhiante pahnih - Bethsy leh Pensy-i te nen hian sa turin min sawm a, kan sa ta a ni," a ti.

"Trio hian a nuam khawp mai a, ka zaipuite an thiam a, insit a awl khawp mai. Tun bak pawh hi kan la tiho leh mai thei. Cee-a hian hla dang siam leh a tum a, chu chu sakho leh tura a ruahman deuh a ni. Kan puitlin chuan kan la tiho leh ang. Kan pathuma kan sak hetianga a hlawhtling hian min tiphur a, keiniho pawh hian han zaiho leh kan châk khawp mai," a ti bawk.

Temi Sailo bik hian tunah hian a music video tur a buaipui leh ṭan tawh a, recording an zo tawh a, video shooting an hmabak. July thla emaw, August thla emaw khi chuan tihchhuah theih a inbeisei. A hla thar tur hi nu leh pa thlenga an duh tur chi, Mizo ngainat zawng tur tak niin a sawi.

Rainbow Ṭhazual Faknaah hian a hmaa pathumna, One in Christ chu pahnihnaah an rawn chho a, pahnihna ṭhin TBC-a chu pathumnaah a chhuk thla ve thung. Hlimhlimi chuan a dinhmun pangngai, palina a la luah a, parukna aṭangin Grace Lalchhanhimi chu panganaah a rawn inhlangkai a, pangana ṭhin Betea chu pasarihnaah a chhuk thla thung.

RAINBOW THAZUAL Fakna
10 C Lalrindiki - Mamawh chhanna
9 T Lalrinfela - Lalpa hmantlak
8 Ark of Melody - Thlarau thianghlim hruai
7 Betea - Lungchhir a sawt lo
6 Vanlalpari - I ropui nan
5 Grace Lalchhanhimi - Aw ropui ber
4 Hlimhlimi - Ka fak ang che
3 TBC-a - Min tlan ta
2 One In Christ - Ka zai anga
1 Bethsy, Pensy, Temi - Mamawh chhanna Lal Isua