Jurassic World a hlawhtling zel Terminator Genisys-in beisei a pha lo

Hapta li chhuah a nih tawh hnuah pawh Jurassic World chu a la hlawhtling zel a, North America-a movie tihchhuah zingah, ticket hralhna, box office hmun aṭanga ticket an hralh chhuah aṭanga sum lalut hnem ber a la ni fan.

Jurassic World hian kar tawp chhung khan dollar mtd 30.9 lai mai a la lak belh cheu a, hengte nen hian North America bik aṭanga a sum lakluh tawh zawng zawng chu dollar mtd 558 zet a ni a, The Dark Knight ai khan North America-a a sum lakluh hi a tam tawh zawk a ni. Khawvel puma a sum hmuh tawh zawng zawng hi dollar tld 1.4 niin, kar tawp chhunga US pawn aṭanga a sum hmuh chhuah hi dollar mtd 42 a ni.

Animated movie, Inside Out kha pahnihnaah a la awm thei a, kar tawp chhung khan dollar mtd 30.1 lai a lakluh belh leh thei. Terminator Genisys chuan beisei a pha lo a, pahnihna pawh luah pha loin pathumna aṭangin bul a rawn ṭan. Terminator thar ber hian kar tawp ni thum chhungin dollar mtd 28.7 chauh a hmu chhuak thei a, a hma nia an lo chhuah tawhte nen, ni nga chhunga a sum lakluh zawng zawng chu dollar mtd 44.2 a lalut tawh.

Terminator Genisys hi tunkar hian Germanu, Italy leh Spain-ah te chhuah a ni ang a, heng ramah te hian beisei a sang a, a dinhmun a siam ṭha pha mai thei. China-ah engtikah nge an chhuah ang tarlan a la ni lo a, China hi movie market-a US dawta lian a nih avangin Terminator siamtute beisei a sang hle.

Box office movies

"Jurassic World" - $mtd30.9

"Inside Out (2015)" - $mtd30.1

"Terminator Genisys" - $mtd28.7

"Magic Mike XXL" - $mtd11.6

"Ted 2" - $mtd11

"Max" - $mtd6.6

"Spy" - $mtd5.5

"San Andreas" - $mtd3.3

"Me & Earl & the Dying Girl" - $mtd1.3

"Dope" - $mtd1.1