Mizo Talent zaninah chhunzawm dawn

LPS Vision Production buatsaih, 'Mahindra XUV 3XO Mizo Talent' neih mek chu zanin hian chhunzawm a ni leh dawn a, top 3 tling turin an inel ang. Inrinni zanah Grand Finale neih a ni dawn a, Youth Icon 2024 top 10-te an inlan dawn bawk.

TV Reality show ngaihhlut hlawh takah hian talent nei ṭha tak tak an inlan a, show hmuhnawm tak chhawpchhuah a ni. Zanin hian LPS Arena, Falkland-ah show hmuhnawm tak en tur a awm leh dawn a, zanina intihsiakte aṭangin top 3 thlan chhuah a ni dawn a, top 3 tlingte hi Inrinni zan, Grand Finale ṭan tirah puangin an intihsiak chhunzawm dawn a ni. Hemi hnuah entertainment hun hman a ni zui dawn a, Youth Icon top 10 te an zai ang.

Mizo Talent show-ah hian judge pali -Victor, Rosy K Remsangpuii, Nutei Pautu leh Mapuia (FTH) te awmin, anni bakah mipuite chu judge pangana an ni a, mipuiin an ṭan zawngte an vote theihna tur hi LPS Youtube Channel-ah dah chhuah a ni. Contestant ṭantute an ṭang tlang bawk a, vote pawh a tla ṭha hle.