Zaninah KṬP Zotlang Branch film 'DAR 10' chhuak dawn

Kristian Ṭhalai Pawl Zotlang branch chuan an kohhran biak-in sak puala an film siam 'DAR 10' tih chu zanin hian Vaivakawn Auditorium-ah an tichhuak dawn. Kristian ten kan duhthlanna hmanga humsual kan daina leh chhungkaw inrelbawlna fel lo vanga chhiatna a thlen theih dan tarlanna lam niin, tunlai kan Zoram khawvel inher dan nena inmil tak tur a ni.

'DAR 10' film script hi branch KṬP member panga - Lalmuansanga, Malsawmkima, H. Vanlalruata, Zohlimpuii leh Vanlalremi te thawk hoin an ziah a ni a, director hi Dr. Lalmalsawma Ralte niin director of photography hi H. Vanlalruata, Zohlimpuii leh Vanlalremi te an ni. Videographer hi Malsawmdawngkima, MDS Production a ni a film hmuhnawm tak kan hmuh theih phah dawn.

Film-ah hian KṬP member aṭangin main role chang tur pawh thlan chhuah an ni a, film kaltlangin an branch theihna an rawn pholang dawn a ni. 'DAR 10 'hi Aizawl huam chhung hmun hrang hrangah show neih a nih hnuah, October aṭangin streaming platform Lersia Play-ah en theiha dah chhuah a ni ang.