Zonet Arkaiden Zan: C. Durthanga pualin hun hmang dawn

Zonet Arkaiden Zan chu zanin hian Chanmari Hall-ah neih a ni leh dawn a, hla phuah thiam C. Durthanga puala hun hman a ni ang. A hla phuahte hi Lalrinmawii (Arini), Daniel Lalawmpuia, David Darlong, Diki Renthlei, Priskili, Jenny Jathang leh Grace Lalchhanhimi ten an sa dawn a ni.

C. Durthanga hi March 15, 1944 khan Khawruhlianah a piang a, an unau hi 12 an ni. Zirna lamah middle thleng a kal a, pawl 10 zir zawm a tum laiin rambuaiin a nang a, MNF underground a zawm a, man tawkin jail-ah hun eng emaw chen a tang a ni. Silchar jail-a a tan laiin 'Jail run thim' tih a phuah a, jail aṭanga a chhuah hnu kum 1971-ah a bialnu thi ta, Khawrihnim nula Lalsawmi hriatrengna atan 'I rau i thla tal rawn tir rawh' tih a phuah leh bawk. He hla hi C. Lalrinmawia'n a sa a, a hit zui hle. Tezpur jail a tan laiin 'Min lo hmuak ang che vangkhawpui tualah' tih phuah lehin, R. Vanlalrova'n radio-ah kum 1970 bawr chho khan a sa lar hle.

Kum 1959 khan C. Durthanga hian a hla phuah hmasa ber 'Kiangawiin mual min liamsan mai lo la' tih a phuah a, hei hi chu sak lar a ni zui vak lo. Hla 500-600 inkar a phuah a, Zoram pum huapa lar tak tak eng emaw zat an awm. Heng zingah hian 'Ka Thlang Mizo val ngei', 'Chhul khat kual, 'I rau i thla tal rawn tir rawh', 'Damlai thlan thim' leh 'Lam ang lo let leh rawh' tihte an tel. Kum 2003-ah zaithiam hrang hrangin a hla phuah an sakna, C. Durthanga Hlate tih album chu tlangzarh a ni.