Conflate Video Production leh Lersia play thawk dun dawn

Mizo filmmaker ṭha zinga mi, Conflate Video Production leh Lersia play chuan, movie thar 'Lung In (Life Sentence)' siam turin thawh dunna an ziak fel leh ta.

Conflate Video Production, B Lalbiakvela leh Ngaihawma Fanai te movie siam hian belhchian a dawl bik ṭhin hle. Cinematic composition leh editing an thiamin, directing leh dialogue-ah an danglam ṭhin. An kut chhuak Dengi I love you, Nukawki, Mokawr, Thih leh Dam part 1&2 leh Khawnge tihte chu Lersia Play-ah hian en tur a awm a ni. An pahnih hian Mizo Best Film Award vawi 2 an la tawh a, best cinematographer leh best screenwriter bakah best director nihna te an la kim vek tawh a ni. Production pakhat aṭanga hetiang award la thei awmchhun an la ni.

Film thar turah hian film star kan neih ṭhat ber zinga mi, Rosangpuii Ralte leh Gilbert Colney te chu a changtu ber an ni dawn a, child actor thar Sarah Vanlalhriatpuii bakah hmelthar hmuh tur an awm bawk ang. An project thar hi a story a ṭhat bakah a hmuhnawm hle tura beisei a ni.