Kum 2020 chhunga album hralh kal ber Taylor Swift 'Folklore'

Rolling Stone magazine chuan kum liam ta, kum 2020 chhunga album hralh dan hrang hrang, streaming service leh download-tu tam dan zawng zawngte an zirchian hnuah Taylor Swift-in puangzar lawk lem loa a tlangzarh 'Folklore' album chu nikum chhunga album hralh kal ber a ni.

Taylor Swift studio album pariatna 'Folklore' hi Rolling Stone Year-End Top 200 Albums Chart-ah topper a ni a, album-equivalent unit maktaduai 2.3 dawn nikum chhung khan a hmu chhuak hman niin an tarlang. Nikum July thla khan Swift hian 'Folklore' hi a tlangzarh thut a, hetichung hian hralh a kal nghal rem rem hle a, record hrang hrang a siam zui tho. On demand audio stream-ah a hlate hi tluklehdingawn 1.1 lai an stream anga chhut niin album copy maktaduai 1.2 lai a hralh bawk a, nikum chhung khan ani aia album hralh tam hi an awm lo.

Taylor Swift hian album sales chart-ah album pahnih ngawt a lanpui a, kumtawp lama a tlangzarh, Folklore laizawn nia a sawi 'Evermore' chu nikum chhunga album hralh kal pariatna a ni a, kum tawp dawn a ruaiah tlangzarh mah se copy 270,000 a hralh hman tho. RS Year-End Top 200 Albums Chart-ah hian Taylor Swift album panga lai a lang a, Lover kha 28-na a, Evermore kha 63-na niin, 1989 leh Reputation-te kha 116-na leh 165 an ni. Drake chu chart-a album lanpui tam ber a ni a, a album paruk lai a lang bawk.

Lil Baby album 'My Turn' chu RS Year-End Top 200 Albums Chart-ah pahnihna a ni a, My Turn hi   on-demand audio stream-ah phei chuan tld 3 vel lai stream a ni a, mahse album sales-ah 'Folklore' hi a pha lo nasa hle thung a ni.

Nikum chhunga chart hrang hranga a chung lama hmuh tur awm deuh reng Pop Smoke 'Shoot for the Stars. Aim for the Moon' chu pathumna a ni thung. He album hian album-equivalent unit maktaduai 2 vel a hmu chhuak. The Weeknd 'After Hours' chu palina a ni a, Juice WRLD chuan 'Legends Never Die' hmangin top 5 a khar.

Korean supergroup BTS chuan an album Map of the Soul: 7 kha copy 361,000 lai an hralh a, on demand audio stream chhiar tel loha, album sales-ah ringawt chuan album hralh ṭha pathumna an ni phak. Chutihrualin a pahnih data lak khawpa chart an siamah erawh 40-na a ni thung.

Rolling Stone On Demand Audio stream chart lamah erawh Hip-Hop music lamin lalna a chang a, Lil Baby 'My Turn' chu nikum chhunga stream tam ber niin vawi tld 3 lai stream a ni. 'Shoot for the Stars, Aim for the Moon', Pop Smoke chu stream hlawh tam ber dawttu niin vawi tld 2.3 lai stream a ni ve bawk a, Juice WRLD 'Legends Never Die' chu vawi tld 2.3 stream niin pathumna a ni thung.