Zualbawihi album pahnihna 'Vul reng rawh' Tlangzarh a ni ta

Nizan dar 7 khan Aijal Club-ah Zualbawihi album pahnihna 'Vul reng rawh' tih chu Minister Lalrinmawia Ralte-in a tlangzarh.

Zualbawihi music video album tlangzarh inkhawmah hian C. Dinthanga chu Master of Ceremony a ni a, C. Luri'n hunserh hmangin, Joy Zairemmawia'n album thlirlawkna a nei. Tlangzarh inkhawmah hian Zualbawihi hian a album-a hla ṭhenkhatte a sa nghal a, amah bakah hian Lalfamkima leh Christy Zaithanchhungi te an zai bawk.

Zualbawihi album tharah hian hla 20 a awm a, heng zinga 17 te chu music video a ni a, Krismas hla pawh a tel. Zualbawihi album-a hla eng emaw zat hi chu TV lamah single-in kan hmu tawh hlawm a, hla thar hlak, kan la hmuh ngai loh paruk a awm dawn. A album-a hla hi a variety a ṭha hle a, lengzêm bakah, nungcha, ramngaw humhalhna lam te pawh a dah tel a ni a, Mizo zaia kan hriat lar ṭhin Ramthar Zai te pawh a awm bawk. A album hming put chhan, 'Vul Reng Rawh' tih hla hi Venpuia Khawlhring phuah a ni a, a hla dang pahnih a awm bawk ang.

Kum 2012 khan Zualbawihi hian a album hmasa ber, 'A na asin' tih chu a tichhuak a, a hlawhtling hle a, TV lamah pawh hla thlan hlawh ber ber a ni. Tuna a album pawh hi a ṭhat leh viau beisei ang. Zualbawihi hian album hi siam leh pawh a la tum a, mi tam takin an siam ngam tawh lohnaah ani hi chuan documentary atan, nakina a zai theih tawh loh hun thlenga dah ṭhat a, vawn ṭhat atan tiin a buatsaih. Mizote kan buaina ni ta leh, kan music industry-in a chhiatpui, technology lama kan hmasawnna khingbai avanga piracy kan uar ta hi a pawi hle. He album hi mi ta copy chhawng mai lo a, amah ngaina a, a zai hlutsaktute chu lei ngei turin a chah a ni.