Delhi inkahna thleng Sonam Kapoor-in a dem

Bollywood star Sonam Kapoor Ahuja chu Delhi Shaheen Bagh-a CAA-NRC duh lohna lantirtute laka mi pakhatin silai a hmehpuah chu a dem tih sawiin, firfiaka chetna a nih thu a sawi. 'Thlei bik nei politics' a awm niin a sawi hial.

Sonam Kapoor hian a twitter-ah inkahna thleng news hi 'share' in a demna thu a ziak tel a ni. "Hetiang thil hi India-ah thleng tura ka ruat ngai loh  a ni. Hetiang inthliarhranna politics hlauhawm tak hi titawp ru. Inhuatna khat a ni. Hindu mi in nih chuan sakhuana hi Karma leh Dharma a ni tih hria ula, thil thleng erawh hi chu chutiang chu a ni lo ve ve," tiin a tweet.

Anil Kapoor fanu channa film hi nikum chhung khan pahnih tihchhuah a ni a, a hlawhtling dun hle. Kumtir lamah khan romantic comedy film 'Ek Ladki Ko Dekha Toh Aisa Laga' kha tlangzarh a ni a, sum cheng vaibelchhe 39.86 vel zet a lalut. September thlaah khan romantic comedy film tho 'The Zoya Factor' tlangzarh ni leh bawkin cheng vbc 6.91 vel a lalut bawk a ni.

CAA chungchangah khan Bollywood star tam tak chuan an dinhmun sawi langin sorkar an demna thute an sawi lai khan Sonam Kapoor tak hi chuan chiang takin sawiselna emaw, a ngaihdan emaw a sawilang lo. Mahse khatih hunlai khan ngaihbel theih turin Anne Frank thusawi pakhat a social media-ah a post a, sawizui pawh a hlawh hle. CAA duh lohna lam hawi tweet-a 'like'-te pawhin sawizui a hlawh hle bawk a, mahse amah tak hi chuan chiang takin a ngaihdan a sawi lang lo thung.

Inrinni liam ta tlaiah khan kum 25 mi, Kapil Gujjar chuan CAA-NRC duh lohna lantira tharum tel loa nawrh huaihawtte chu a kap a, thi leh hliam erawh an awm lo. Silai hi round hnih a kah hnuah police-te chuan an man zui a, man a nih lai pawh hian inchhuang takin "Hindu-te lo chuan he rama rorelna hi an nei thei lo ang!"tiin a la au pawr hle.

Pawikhawihna thlen hnu lawk hian Delhi chief minister Arvind Kejriwal chuan union home minister Amit Shah chu dan leh thupek national capital-a khauh zawka kengkawng turin a ngen, Amit Shah pawh hian a twitter-ah Delhi Police commissioner a biak tawh thu sawiin na taka hremna lekkawh tura a tih thu a tarlang a ni.

Delhi-ah hian CAA duh lohna lantirnaah inkahna ṭum hnih ni thum chhungin a thleng hman a ni.