Mizo film thar '6:11' en theihin chhawp chhuak ta

Mizo film hit tak tak 'Thingtlang Tlangval' leh 'Lalpa a Ṭha' tih siamtu MSpace Production chuan an movie thar '6:11' chu Lersia Play-ah en theihin an chhawp chhuak ta.

'6:11' hi Kristian film tih theih a ni chungin tunlai Zoram khawvela chhungkaw tam tak buai rukna chhawp chhuah a ni. Hetiang thil hi kan tawn mek ni mah se mipui nawlpui en theih tura siam hi mipui hmaa chhawp chhuah a ṭul kher em, kan zo angem tih theih tak tur a ni. Film-ah hian neih inang inkawp chanchin tarlan a ni a, 'drama' leh 'romance' huanga dah niin thlirtu lam ngaihdan pawh a hrang nuaih ngei ang.

Film-ah hian lemchan thiam kan neih ṭhat tak takte - Vanlallawmawmi, Eddie Tochhawng, Puipuia Pachuau, Lucy Pachuau, Angaihi, Msa Chinzah, Hmai Varte te an chang. Director Malsawma Fanai niin, script hi HMI ziah a ni a, director of photography Thara Khawlhring leh assistant director Rochhara a ni. Sound lam hi Rinngheta kut chhuak a ni bawk. OST pawh Amtea leh Zoramchhani ten thiam takin an sa a, YouTube lamah a en theih a ni bawk.