Zaninah 'Hretu Der' tlangzarh a ni dawn

Mizo film chhuak thar, Project Unlimited Production kut chhuak hmasa ber tur 'Hretu Der' (The Silent witness) chu zanin hian Vanapa Hall-ah tlangzarh a ni dawn. Runmawi app-ah entheiha chhawpchhuah nghal a ni bawk ang.

'Hretu Der' hi Runmawi app produce niin Vanlalawmpuia (Opix Renthlei) direct leh ziah a ni a, film hmuhnawm tak a nih ngei a rinawm. Suspense crime thriller action movie lam hawi niin, cinematographer hi Nicholas Remruatpuia leh Zodinpuia an ni a, Venus studio chu DOP an ni a, makeup artist Ashie Varte a ni bawk. An ni ho hian Mizo film hrang hrangah sulhnu an nei ṭha tawh hle a ni.

Mizo acting huanga thawm nei lian tak tak Andrew Lalruatfela, Eddie Tochhawng , Laraw Colney, Vanlalmalsawmi, Hma-i varte leh Lalduhawma te an chang a, Mizo artist lar tak H.O.M leh Zuali Chhangte an inlan dawn bawk. Film-ah hian Mizo society-a rethei leh hausa inkar hla tawh tak te, dan leh hrai kenkawh har tawh vanga bumna leh tual thahna thlen chhoh dan tarlan a nih bakah, crime leh action scene danglam tak kan la hmuh ngai zen zen loh hmuh tur a awm dawn.