Justin Bieber album thar 'Changes' a chhuak ta

Album thar a ti chhuak dawn tih a puan aṭanga kum khat dawn zet a liam hnuah Justin Bieber chuan nimin khan a album thar 'Changes' chu a tichhuak ta.

Bieber-a'n a fan-te tana a Valentine's Day thilpek hlu tak a pek 'Changes' hi 2015-a a tihchhuah 'Purpose' hnua a album tih chhuah leh hmasak ber a ni a, a studio album pangana a ni bawk.

A album hming 'Changes' a nih ang tak hian kum nga liam ta chhunga JB-a nuna thil inthlak danglam hrang hrang tarlanna album a ni a, a nupui Hailey Bieber tana a hla 'dedicate' te pawh a dah tel a ni.

He album-ah hian mi hrang hrang a thawhpui a, chung zingah chuan Kehlani, Quavo , Post Malone leh Travis Scott-te pawh an tel. 'Changes' a track pahnih- 'Yummy' leh 'Intentions'-te chu a video nen a tichhuak tawh a, kar hnih liam ta khan Kehlani nena an thawhdunna 'Get Me' chu ti chhuak leh bawkin a lar leh tawh hle bawk.

'Changes'-ah hian track 17 zet a dah a, online streaming service hrang hrangah ngaihthlak theih a ni tawh. Belieber ho tan chuan ngaihven ran chi a ni ang.

Bieber hian nikum Coachella Valley Music and Arts Festival-ah khan Ariana Grande nen 'Sorry' an perform zawh khan album a tlangzarh thuai dawn tih a sawi. October thlaah khan a instagram post chu mi makatduai 20-in an like tlin chuan Krismas hmain album a tlangzarh dawn tih a puang leh a, mahse maktaduai 20-in an like tling ta lo a ni.

Thla hmasa khan Valentine's Day-ah album a tlangzarh dawn tih hi a puang a, nimin khan a sawi ang ngeiin a tlangzarh ta a, a 'hit' leh hle tura beisei a ni bawk.

May 14 aṭang hian a album thar tihlarna tur Changes Tour a nei dawn a ni.

Covid-19 vanga harsatna nasa tak tawk mek China a thlawpna lantirna turin Beijing-a children's charity tan ṭanpuina JB hian a pe.

Ningani khan Instagram-ah video dahin "News-a hemi chungchang ka hmuh hian, he natna hi ka nupui, ka chhungte leh ka ṭhiante'n kai ve ta se kan mangan dan tur chu ka hrethiam lo zawk," tia sawiin anmahni ṭanpuina tura thilpek a pek thu a sawi.

China ṭawnga inziak receipt pawh tarlang nghal bawkin an tana a ṭawngṭai sak thu a sawi a ni.