MTV VMA-ah Gaga che ṭha ber

2025 MTV Video Music Awards chu Pathianni zan khan UBS Arena, New York-ah sem chhuah a ni a, American singer-songwriter leh actress Lady Gaga chuan nomination 12 a hmuh aṭangin award pali a hum haw. Gaga hi award hum haw hnem ber a ni a, MTV award 18 a lo dawn tawh chu a belhchhah leh ta a ni. Gaga hian 'artist of the year', 'best art direction', 'best direction' leh "Die With a Smile" hmangin 'best collaboration' award te a dawng.

Ariana Grande leh Sabrina Carpenter-te chuan Gaga hi dawtin award pathum ve ve an dawng bawk. Ariana hian 'video of the year', 'best long-form video', leh 'best pop' a dawng a, Sabrina hian 'best pop artist', 'best album', leh 'best visual effects'-te a dawng ve bawk. Heng bakah hian ROSÉ chuan Gaga ang bawkin Bruno Mars a thawhpuina 'APT' hmangin 'Song of the Year' award a dawng a, Bruno thawhpuina hlate an che ṭha dun hle a ni. Puan lawk tawh angin Mariah Carey chu 'Video Vanguard Award' hlan a ni a, ani bakah Ricky Martin pawh a hmasa ber atan 'Latin Icon Award' hlan a ni.