EA FC 26-ah Mbappe leh Salah an ṭha ber dawn

Video game huanga ngaihhlut hlawh, game developer EA Vancouver leh EA Romania te siam EA FC 26-a player hrang hranga rating pekah Liverpool leh Real Madrid player Mohammed Salah leh Kylian Mbappe te chu rating sang ber an ni dawn tih a chiang ta. EA hian mipa leh hmeichhia games-a top 26 tur an tarlang nghal a ni.

Salah leh Mbappe-te hian overall rating 91 an hmu ve ve a, Mbappe hi player tarlan tawh zingah tlan chak ber niin a pace hi 97 a kai. EA hian Ousmane Dembélé, Rodri, Virgil van Dijk, Erling Haaland, leh Jude Bellingham chu 89 rating a pe thung a, hetih laiin season tluana khel lo Rodri rating sang pek a ni chu sawi zui a hlawh hle thung. FC 26 hi tun thla September 26 hian khawvel puma khelh theih tura tlangzarh tum a ni a, September 19 aṭangin early access Ultimate Edition a tih ṭan theih dawn bawk. Football ngaina leh games ngaina tan a nghahhlelhawm tawh hle.