Parikrama guitarist Sonam Sherpa a thi

India band lar Parikrama lead guitarist Sonam Sherpa chu nimin khan lungphu chawlin a thi.

Sonam Sherpa hi Parikama dintu zinga mi a ni a, nimin khan film chhuak thar tur music recording nei tura a kal chu Kurseon, Darjeeling district, West Bengal-ah lungphu chawl vang hian a thi a, amah hi kum 48 mi a ni.

India ram chhunga guitarist lar ber zinga mi Sonam Sherpa hian Kalimpong-ah school a kal ṭhin a, college erawh Delhi-ah kalin Parikrama bakah hian band dang pahnih Mrigya leh North East Express-te pawh a din tawh bawk.

CNBC Young Turks-ahte pawh lang tawhin amah bakah a band Parikrama pawh hi Download Festival tour lai khan rockumentary-ah BBC an tilang hial tawh a ni. Bollywood film, Manjunath music siam tur khan a band member pui Nitin Malik leh Subir Malik-te nen an thawk ho nghe nghe.

Hauz Khas Village, New Delhi-ah Parikrama School of Music a din a, amah hian a enkawl zui bawk

A bandmate Subir Malik chuan ṭhianpa thihna chuan a ṭhawng hle tih sawiin, movie chhuak thar tur music record-in Kurseong-a a awm lai a ni a, khawiah nge vui a nih dawn pawh ka la chiang lo a ni, tiin a ṭhianpa thih chungchang hi a sawi.

Sonam Sherpa nupui hi Mizo a ni a, Northeast Express vocalist Dina Ralte niin, Parikrama School of Music-ah hian kum 12 chhung music a zirtir tawh a ni.