Mizo Idol top 10 intihsiak a zo

Thawhlehni zan khan Mizo Idol Top 10 te chuan intihsiak an nei a, Zirtawpni zanah result puan a ni ang. Intihsiak boruak a sang tawh a, contestant-te an ṭang a, an theihtawp tak meuh meuh an chhuah.

Thawlehni zan intihsiak bikah khan contestant-te chu team pahniha ṭhen an ni a, team pakhat hi BZA, Blue Waves Recording chuan an zirnaah a kaihruai a, an music pawh a siamsak. Team khat dang leh hi Kima Chhangte-in a kaihruai thung. An zai thiam tawh a, stage sang zel an tlin ngei theihna turin theihtawp ṭheuh an chhuah a, judging panel lam aṭang pawn sawiselna tur a tam tawh lo khawp ang. Mahse top 9 thleng turin pakhat a tlak a ngai a, judge-tena an fak leh thiam an tih tho, mipui pawhin thiam an tih tho zinga mi an tlak ngei ngei a ngai. Top 10 chinte hi judge-te pawhin thiam an tih vek tawh tho kha a ni a, chuvang chuan endik pawh a har tawh viau. Mahse vawi khat sak sual emaw, eng emaw accident awm hlekin an result a khawih thei viau tawh a ni.

BZA team-ah hian Lalremruata, Lai­puitlang; Rachel Lalnunkimi, Venghlui; Rebecca Zorintluangi, Sairang Sihhmui/ Zarkawt; Thawhlehnaniropuia, Zohmun/ Venghlui leh, Lalremruati, Saiha te an awm. BZA chuan, "Ka beisei angin an zai a, an zai ṭha ka ti a, ka lawm khawp mai. Remruati bik kha a zai ṭha viau nachungin ama hla duhzawng bik a thlang a, a sa kha a pawi thei ang emaw chu ka tia; mahse keima mimal ngaihdan a ni a, judge-te'n eng angin nge an ngaih ang tih erawh ka sawi thei lo. Chutihrual chuan a zai chhia ka tihna chu a ni hauh lo, a zai ṭha viau a, mahse hla dang, nalh zawk leh a aw nena inhmeh zawk sa ta se, kha ai khan a invawrh sang lehzual thei ang em tih ka ngaihtuah mai mai a; a mimal hrim hrimah chuan zaithiam ka ti a, Thawhlehni zan intihsiak bikah pawh khan a zai ṭha khawp mai," a ti.

Kima Chhangte team-ah hian Angela Lalremruati, Bawngkawn South; James Lalruatsanga, Mission Veng; Lalbiakmawia, Farkawn/ Republic; Lalrinhlui Tlumang, Chawnpui leh, Wilkinson B. Khuhly, Saiha te an awm. A naute an zai danah Kima Chhangte a lungawi hle, "Anmahni rau rauah an zai ṭha a, ka duh angin an zai. BMA khan duhthu a sam lo deuh em aw, ka tia, mahse ani pawh a zai ṭha viau. An zirna aiin an zai ṭha zawkin ka hria," a ti. Tunah hian Zirtawpni zana mi tur hla a thlanfelpui leh tawh a, track pawh an siamin an zir leh tawh.