RTC-i hla 'Van sipai, lei duty'

Mizo Idol Top 10 intih­siak­ah khan Chawnpui nula Lalrinhlui Tlumang chuan 'Van sipai, lei duty' a rawn sa a, he hla hi RTC Lalduhawmi hla phuah a ni a, 'Ka Ṭawngṭaina' album-ah khan a awm.

He hla hi ringtute chu van lam mi, van khua leh tui kan ni a, mahse leiah hian Pathian hian tihtur neiin min dah a, leiah hian min duty-tir a ni tih sawi chhuahna hla a ni.

RTC chuan he hla chung­chang heti hian a sawi: "Kum 1991 aṭang khan Pathian tan ka inserh hrang a, ka piangthar tak tak a, nun thar tak tak ka nei ṭan a ni. Hemi hnu hian zaia rawngbawlna neih ka châk em em ṭhin a, min sawmtu awm se ka ti ṭhin hle a, mahse min sawmtu lah an awm mai bawk si lo. Ringtute hi van sipai kan ni a, lei lama duty tura Pathianin min dah a ni tih ka vei a, ka rilruah a awm reng a, September 10, 1991 khan he hla hi ka phuah a ni. A hnuah, Ramthar Veng Presbyterian Kohhranin camping an buatsaih a, chutah chuan counsellor turin min ruat tlat mai a, ka beisei loh leh ka tum loh zawk rawngbawlna a ni a, ka inserh hran hnua rawngbawlna pui tham ka neih hmasak a ni awm e. Hemi ṭum hian 'Ngawlveite inhlanna' tih hla kha ka phuah nghe nghe.

Hemi hnu hian, kum 1998-a Serchhip-a KṬP General Conference neih ṭum khan Central KṬP chuan mak tak maiin zaia rawngbawlna min pe a, guest artist angin min sawm a ni. Kha kha kal chhuaka zaia rawng ka bawl ṭanna tak tak a ni a, khata ṭang khan ka rilruah, 'Tunah chuan Pathianin kei van sipai, van khua leh tui hi leia duty tak tak turin min ti ta e,' ka ti thei ta a ni," a ti.