50 Cent a tlachhia A ba neihte pek tur pawisa a nei tawh lo!

A thawk chhuak hnem a, a zaina aṭangin sum tam tak a hlawh chhuak a, mahse a hmang thiam lo a ni. Rapper hlawh­tling 50 Cent chuan Thawhlehni khan court-ah a bankrupt a ni tih a file a, court-in a pawmsak chuan a ba rulh tur te, a chhiah pek turah te ruahmanna thar siam a ni ang.

50 Cent tia kan hria, a hming tak Curtis Jackson hian hman deuh khan Lastonia Leviston nena an video chu Leviston phalna la hmasa loin internet-ah a dah a, Leviston hian a duh lo hle a, court-ah khingin court chuan 50 Cent chu dollar mtd 5 pe turin a hriattir a ni.

50 Cent hian Man­hattan Court-ah a bank­rupt a ni tih hi a thehlut a, US-a bankruptcy dan an neih bung 11-na anga humhimna a dil a ni. A tlachhe tak tak em tih erawh sawi chian a la har leh. May thlaa Forbes chanchinbuin hip-hop artist hausa a tarlanah khan 50 Cent hi 4-naah awmin dollar mtd 55 hu a nei angin a tarlang.

Bankruptcy hi dan lam ṭawngkam a ni a, miin creditor-te hnena a bat a pek theih loh hi a ni a, a bankrupt tak tak em tih erawh chu court thuchhuak aṭang chauhin a ni ṭhin.