Fashion khawvela sum lalut hnemte

Fashion industry a lian tial tial a, sum virvel pawh a tam tial tial a, mi tam tak chuan an din chhuahpui mai ni loin, khawvela hausa ber zingah an lan theih phah. Fashion industry tih hian thawmhnaw inbel chi mai ni loin, inhnawih mawi lam zawng zawng pawh a huap tawh a, cosmetic-a sumdawnna ringawt pawh a pui tham em em a ni.

Cosmetic industry lian tak tak a rawn tam tial tial a, thuamhnaw lamah pawh a siamtu leh a ha lartu model te an tam tial tial a, hlawhtling an pung zel. Mahse British super model Kate Moss ang tluk erawh an la awm lo. Kum 40 mi a ni tawh nachungin kum tin fashion khawvelah hian dollar mtd 7 chu a sum bawmah a luh belh ziah a, hei hi a sumdawnna dang tel hauh lo a la ni fan. Forbes-in 100 Most Powerful Celebrities hming a tarlanah pawh ani hi chu a lang thei zel.

Kate Moss hi tunah hian Gucci, Calvin Klein, Chanel, Dolce & Gabbana, Bulgari leh Rimmel te nen an thawkho a, kum 2010 aṭang khan handbag ama pualin a tichhuak bawk. Tunah hian TopShop chuan designer-ah an hmang mek.

Tori Burch hi pheikhawk lam, a bikin ballet flat ngaina chuan a hming an hre viau ang. Forbes chuan Tori Burch hausakna zawng zawng hi dollar tluklehdingawn 1 hu niin a chhut. A larpui em em chu Reva ballet flat hi a ni a, he flat hi a nu, Reva Robinson hmingchawia a phuah a ni nghe nghe. A zir thiamna lam erawh fashion nen a inkaihhnawih lo mai pawh ni loin, catwalk hrim hrim pawh a ti ngai lo; modelling lam hi a kalna a ni ngai lo. University of Pennsylvania aṭangin history a zir chhuak. Pheikhawk mai bakah handbag leh thawmhnaw man to, tlereuh leh accessory dangte a siam chhuak bawk.

Burberry hi kan hre fo ang a, mahse an CEO erawh a hming keini chuan kan hre lar lutuk lo mai thei; an CEO hi Angela Ahrendts a ni a, Forbes-in a hausakna a chhutsakah chuan dollar tluklehdingawn thum vel chu a tling ve awm e. He nu hi hna atchilh tlur mai mi a ni a, amah pawh a invawng uluk hle. Tuk tin, zing dar 5-ah a email a check ziah a, ni tin Diet Coke no ruk a in ziah bawk. Luxury fashion lamah chuan khawvela mi ropui a ni.

Louis Vuitton-a an Executive Vice President, Delphine Arnault pawh hi sum lamah chuan a phâng lo. A hausakna hi tarlan chiah ni lo mah se, fashion khawvelah chuan hmeichhe hausa ber a ni. Mahni thu duh tak a ni a, hei hi a pa aṭanga hausa sa an nih avanga a chhawm a ni mai thei; a pa hi French sumdawng hausa, Bernard Arnault a ni. Delphine-i thu duhzia leh a thu ang tihtlang ngei ngei a tumzia hi khawvel hriat a ni. Karl Lagerfield chuan, "Delphine-in khawiah emaw kal tura a tih che chuan i kal mai a ngai ang," a ti.

Heng mite bakah hian Avon CEO Sheri McCoy te hi a hausa ber pawl leh thiltithei ber pawl a ni a, Vogue chhiar ṭhin tena kan hriat em em tur Anna Wintour pawh hi hausa ber pawl a ni.