Khawvelin hun vawt zawk a hmachhawn hnai

Global warming kan sawi mek laiin, ni awm dan avangin, kan hma lawkah khian hun dang zawng aia vâwt bik, Mini Ice Age kan hmachhawn dawn niin mithiamte chuan an sawi. Hetiang hun vâwt bik hi kum za chuang kal taah khan khawvelah a lo thleng tawh a ni.

Scientist-te chuan kum 2030 aṭanga 2040 chhung khian hun dang zawng aiin khawvel a vawt dawn tih an sawi a, hei hi ni her vel leh awm danina a hrin chhuah tur a ni. Hetiang Mini Ice Age hi kum 1646 aṭanga 1715 te khan a lo thleng tawh a, London khawpuia lui luang, Thames lui pawh a khang hial nghe nghe. Mini Ice Age thlen hun tur hi tarlan dan a inang lo a, Daily Mail chuan kum 2020 aṭanga 2030 angin a tarlang a, Times of India chuan 2030 aṭanga 2040 chhunga thleng tur angin a ziak thung.

Times of India-in a tarlan dan chuan kum 2030 aṭanga 2040 chhung khian ni chêt dan khi zaa 60 ngawtin a tlahniam ang a, chu chuan khawvelah mini ice age a thlen dawn a ni. Llandudno-a National Astronomy Meeting-ah Professor Valentina Zharkova chuan Ice Age thlen tur thu hi a sawi chhuak.

Kum 1843 khan scientist-te chuan kum 10 aṭanga 12 danah ni awm dan a inthlak ṭhin tih an hmuchhuak a, a inthlak dan leh a awm phung erawh a inthlak nasat avangin a lo thlen dan tur sawi lawk a harsa hle. Tunah chuan thiamna a sang zel a, ni awm dan pawh an hre chiang zual a, ice age thlen hun tur pawh chiang zawk leh dik zawkin an hre thei ta a ni.

Professor Zharkova leh a team te chuan ni chhungah khian chhim leh hmar zawngin magnetic wave inang lo pahnih a kal a, he magnetic wave che vel hian sunspot tlem leh tamah kawngro a su em em a, kum 2022 khian sunspot a tlem ang a, kum 2030 aṭanga 2040-ah a tlem bawk ang a, heng hunah te hian khawvel chu a vawt zual dawn a ni, an ti.