Feli Fanai 'Ka liam e' ti mah se a liam thei lo

Rainbow Ṭhazual Chart-ah Feli Fanai aia ṭha an la awm rih lo. 'Ka liam e' tih hla rawn sa mah se, pakhatna dinhmun aṭangin Feli Fanai hi a la liam thei rih lo a ni.

Rainbow Ṭhazual Lengzem chart chhuak hmasaah khan Feli Fanai hi pakhatnaah a awm tawh a, Myztic Sailo hla phuah, 'Ka liam e' tih hla hmang hian hlawhtlinna a chang chho rih zel a, a daih rei zel ang em tih erawh rin thiam a har a, a hnuaia awmte pawh an ṭha hlawm hle.

'Ka liam e' tih hla R&B leh hip-hop lam rawngkai deuh lek lek a nih avangin ngainat a hlawh a, Feli Fanai hian a sa thiam bawk nen, pakhatna a hauh pawh a âwm viau. Amah hi programme a ngah avangin a zin nasa a, a taksa pawh a chau viau ṭhin, mahse zai erawh a chhunzawm ang a, ṭan a la zel dawn. Hetihlai hian album lam erawh a la hawi rih chiah lo a, music video single tihchhuah a duh tawk rih. Tunlai hian Anggu's Collection an buaipui mek a, hetah hian ani pawhin hla a sa a, a hla hi a malin an tichhuak ang.

Rainbow Ṭhazual chart-ah hian C. Sanga chu pahnihnaah bawk a awm leh a, ani hi Mizo mipaa kan zaithiam neih ṭhat berte zinga mi a ni. MSU Shillong chuan hma an rawn sawn zel a, palina aṭangin pathumnaah an rawn kai a, Famkimi Kawlni chu pathumna aṭangin panganaah a chhuk thung. Thiamchantira chu palinaah a rawn kai bawk.

Top 10-ah hian Samuela Chhangte leh Lawmi Khiangte te an rawn lang thar a, Essy hla hit Hey leh J. Lalremruati'n pakhatna a lo nihpui fo 'Inhrilh dun ang' tih chu an liam ta.

Rainbow Ṭhazual Lengzem 10

1 Feli Fanai - Ka liam e

2 C Sanga - Chhingkhual Lenmawi

3 MSU Shillong - Ram leh hnam tan

4 Thiamchantira - Lokir rawh

5 Famkimi Kawlni - Ka ngai em che

6 Thangromawia Thomte - Hmangaihna aia rosum

7 Tetea J - Chawlhni tlai len

8 Lawmi Khiangte - Tunge Ruati I ngaihzawng

9 Christy - Tleitiri

10 Samuel Chhangte - Lungrun