Mizo Idol top 10 intihsiak zaninah BZA team leh Kima Chhangte team-in an ṭhen

Mizo Idol intihsiak a hot ṭan a, zanin dar 8 aṭang hian top 10 te'n intihsiakna an ṭan ang a, Zirtawpni zanah result puan a ni ang. Top 10 aṭang hian thil danglam deuh hleka siam a ni a, top 10-a tlingte team pahniha ṭhen an ni a, pakhat hi BZA, Blue Waves-in a ho a, pakhat dang hi Kima Chhangte, Home Free Recording-in a ho thung.

BZA team-ah hian Lalremruata, Laipuitlang; Rachel Lalnunkimi, Venghlui; Rebecca Zorintluangi, Sairang Sihhmui/ Zarkawt; Thawhlehnaniropuia, Zohmun/ Venghlui leh, Lalremruati, Saiha te an awm. BZA chuan, "Hetia team-a an siam hi a ṭha khawpin ka hria a, mahse keini lam tan hian tlem chuan a hahthlak ve deuh mai thei. Contestant-te tan hian a ṭangkai dawn a, ṭhenkhat chu experience la nei lutuk lo an ni ve a, kaihhruai an ngaihna chinte pawh a awm. Hla thlan chungchangah pawh an mawi tih leh an sak châk zawng ringawt kha intihsiaknaah chuan a ṭha ber tawh lo a, an aw mil turte thlanpui an ngai a ni," a ti.

Kima Chhangte team-ah hian Angela Lalremruati, Bawngkawn South; James Lalruatsanga, Mission Veng; Lalbiakmawia, Farkawn/ Republic; Lalrinhlui Tlumang, Chawnpui leh, Wilkinson B. Khuhly, Saiha te an awm.

Kima chuan, "Ka nauteho chu an zia dawn khawpin ka hria. Hla hlui lam an thlang a, chu chu tunlai deuh zawkin a music kan siam bakah a sak danah pawh tunlai mil deuh hlek turin ka her rempui. Kaihhruai em em an ngaiin ka hre lo a, anmahnin an hla tur an thlang a, kei chuan a sak dan leh a music genre ka lo siamsak a ni deuh ber," a ti.