Khawvela mipui hlimna ber Panama ram India aiin Myanmar an hlim zawk!

2014 Gallup-Healthways Well-Being tihchhuah a ni a, Panama ram mipuite chu khawvela mipui hlim ber an ni. Keini aia ram nuam lo zawka kan ngaih, Myanmar chu a nuam zawk a ni mai thei, India aiin tehnaah hian an sang zawk!

2014 Gallup-Healthways Well-Being ranking a tihchhuah hi tehna hrang hrang aṭanga an teh hnuah leh, khawvela mi hrang hrang mi 146,000 zet zawhna an zawh aṭanga siam a ni. Tehna lian tak tak panga hman a ni a, pakhat chu Purpose a ni. Purpose-ah chuan an thil tih nuam an ti em, an thlen chin leh tihhlawhtlin chinah an lung a awiin an hlim em tih a ni. Social a awm leh a, hetah hi chuan inngaihzawnna leh nupa inkar bakah midang leh an chhungte nena an inkar a nuamin a hlimawm em tih a ni. Financial lamah chuan sum leh pai tlakchham avanga rilru buaina awm leh awm loh te, sum leh pai, ei leh bar dinhmunah him tawka an inhriat leh hriat loh chu tehkhawng pawimawh a ni. Community-ah an chenna hmun leh khawsakna hmun nuam an ti em tih leh, Physical-ah chuan an hriselna a ṭha em tih te, hriselna kawnga inenkawlna te a ni.

Tehna hrang hrang aṭanga tehna ram nuam leh mipui hlimna ber chu Central America-a mi Panama ram a ni. America khawmual pahniha mite hi an hlimin ber a, Africa an hlim lo tlangpui a, a bikin Sub-Saharan ramte an hlim lo.

Panama dawtah hian Costa Rica, Puerto Rico, Switzerland, Belize, Chile, Denmark, Guatemala, Austria leh Mexico te top 10-ah an lang. Hlim lohna ram thungah chuan Afghanistan-in hnu an khar a, Bhutan chu 144-na, Cameroon chu 143-na, Togo 142-na, Tunisia, Congo Kinshasa, Ivory Coast, Benin, Haiti leh Ghana te a chhe ber lam an ni. India chu 70-naah daih a awm a, chutihlaiin kan awh em em loh, Myanmar ram chu 20-naah an lang thung. India elpui China chu 127-naah a awm.