V Day-ah Marina-i'n in hmun a dawng Hla thar a tichhuak hnai
Tunhnaia 'Thlawitenali' tih hla thiam tak maia rawn satu Mizo Idol star Marina Vanlalhriapuii chuan nimin Valentine's Day khan inhmun a dawng mauh mai.
Marina-i hi Kanhmun khua a ni a, an khaw Village Council chuan inhmun hi an pe a ni. VC, YMA leh khawtlang mipuite chungah a lawm hle tih Vanglaini a hrilh.
Kanhmun hian Marina-i hi an khaw tihming ṭhatu, Zoram khawvela mi tam takin Kanhmun an hriat phahna nia an ngaih avangin an chawimawi let ve theihnaa ngaiin inhmun hi an pe ta a ni.
Hla thar 'Awithangpa tlawh zai' a tichhuak dawn
Mizo folksong 'Awithangpa tlawh zai' chu thlalehah tihchhuah a tum bawk. Marina-i hian tunhnaiah folksong lam a rawn thar thawh nasa a, album-te hial pawh a siam tawh. Hemi a nih avang hian 'Awithangpa tlawh zai' pawh hi a sa mawiin kum upa lam lung a len leh hlein a rinawm.
Vawiin aṭangin shooting a nei ṭan dawn a, a hla erawh Zonun recording studio-ah a record fel tawh thung. Music video hi Hebron kut chhuak a ni dawn thung.