Taylor Swift Billboard album chart-ah a ropui zual zel
Zaithiam tam taktena an la tawn loh leh an la tih theih mang mang loh Taylor Swift chuan a rawn tawng. Chawlhkar 36 chhunga album copy maktaduai 5 hralh thei.
Taylor Swift hian a album, '1989' hi a hlawhtlinpui char char hle a, he album hi album tihchhuah tawh zawng zawng zinga hlawhtling ber pawl a ni a, kum 2004 hnua album hralh chak ber niin, chawlhkar 36 lek chhungin copy maktaduai 5 zet a hralh thei. Swift-i record siam hi Usher-a siam hnua thleng leh hmasa ber a ni a, Usher erawh a khum lo. Usher kha, kum 2004-a a album tihchhuah, Confession kha a hlawhtling a, chawlhkar 19 chhungin copy maktaduai 5 a hralh thei.
1989 album hi Taylor Swift tan chuan copy maktaduai nga a hralh tlin theih album pathumna a ni. Ama hmingchawia a tihchhuah Taylor Swift kha copy maktaduai nga a hralh tling tawh a, hemi hnu hian Fearless pawh kha copy maktaduai nga bawk a hralh leh.
Hei mai bakah hian Swift hi a neu lo; hmeichhe zinga Adele hnua copy maktaduai nga hralh theih album nei hmasa ber a ni bawk. A hmaa miah khi chuan copy maktaduai nga hralh tling chak ber zinga mi a ni a, tunah hi chuan Adele-in 21 album a tihchhuah hnua hmeichhe zaithiam zinga copy maktaduai nga hralh tling leh thei awm chhun a ni. Adele album 21 hi tun thlengin copy maktaduai 11 lai an hralh tawh.