Lehkhabu bawm: Mafaa Hauhnar lehkhabu thar 'Riahrûn Remna' tlangzarh

Mizo thu leh hla khawvela hming langsar, Mafaa Hauhnar (L) thuziak hrang hrang la tihchhuah loh dakhawmna lehkhabu, ‘Riahrûn Remna’ chu nimin khan an chenna in, Tlangnuamah C. Lalnunchanga'n a tlangzarh.

‘Riahrûn Remna’ hi kum 2018-a a thih hmaa a lehkhabu hnuhnung, Mizo Academy of Letters (MAL)-in Book of the Year 2018-a a thlan, ‘Hringnun hrualhrui’ hnua a kuthnu tihchhuah leh hmasak ber a ni.

Lehkhabu thlir lawktu, Lalrammawia Ngente chuan lehkhabu hlu leh ṭha, a hming leh ziaktu nena inrem thlap tiin, “A lehkhabu hmasate ang maia ropui, ka hmuh dan phei chuan Mafaa sermon ni maiin ka hria,” a ti.

Mafaa Hauhnar tia hriat lar, H.Lalrinfela hian a thih hma khan lehkhabu panga - Chawlhna Tuikam (1997), Thlaler Aurawl (2008), Vaihna Vartian (2010), Hlim Ni leh Nuih Lai Ni (2011) leh Hringnun Hrualhrui (2018) a tichhuak hman. A thih hma thlengin Vanglaini chanchinbuah ‘Thu leh Hla Huang’ neiin kar tin a ziak ṭhin bawk. ‘Riahrûn Remna’ hi Rs. 300 man niin lehkhabu dawr hrang hrangah zawrh nghal a ni.