Fashion Fiesta

November 1, 1974 khan Kitty White chu George White leh Mary White te inkarah London khaw daifemah a lo piang a, phirpui Mimmy White a nei nghe nghe. Mi hlim thei tak leh mi khawngaihna ngah tak niin a phirpui nu Mimmy, mi zakzum tak nen chuan an inkawmngeih hle. Chhang ur leh a nu-ina Apple Pie a siam te chu a ngaina hle a, English, Music leh Art te hi a subject ngainat te an ni.
Hetia a chanchin han sawi mai chuan hmeichhe pakhat chanchin sawi ni awm takin kan lang awm e. Amaherawhchu, tuna a chanchin kan ziah lan tur hi khawvelina kan hmelhriat lar >m >m mai Hello Kitty a ni.
Mi tam zawkina kan hmelhriat dan chu zawhte var cute tawk, bowtie sen a beng veilama vuah duhawm >m >m mai, bag, thawmhnaw, pheikhawk, ṭhi, in chhung bungrua leh thil engkima kan hmuh ṭhin a ni a, he zawhte lem hmel hi sawi zau vak ngaiah ka ruat lo, a duplicate leh original pawh hriat hran loh khawpin kan ni tin mamawh eng ilo engkimah kan hmu ṭhin a ni.
Japan ramah chuan induhsak lantirnan leh chhungkua ṭhian ṭha intlawh nikhuain tarmawi inpek te hi an chin ṭhan a ni a. Chung siamchhuaktu company lian tak mai Sanrio Company chuan Silk hmanga tarmawi siamchhuah an chin chu tlema tihchangtlun deuh ṭhaa hriain an hnathawk zinga mi Yuko Shimizu chuan Hello Kitty character hi a siam chhuak a, tun hnuah erawh Yuko Yamaguchi-in a enkawl chhunzawm ta a ni.
Hello Kitty kan hmuh hmasak ber chu 1975 khan Coin Purse an tih mai purse te fel etah a ni a, Hello Kitty chu bawnghnute bur leh sangha khawina inkara dingin an siamchhuak phawt a, rin aia mite'n an lo hlut avangin Coin purse mai ni lo, stickers, box leh bag-ah te an siamchhuak leh a ni. A cute >m avangin a tirah chuan naupang lam tana duan chhuah phawt a ni a, naupang chauh lo pawhin an lawm tak viau avangin 1990 chhoah chuan puitling leh nula lam tan thawmhnaw, ṭhi leh eng ilo, phone cover leh pheikhawk te thleng pawhin kan hmu chho ta zel a ni. Fashion khawvela rawn tilartute zingah chuan zaithiam lar Mariah Carey leh Lady Gaga te hi a langsar zual an ni awm e.
Fashion icon ropui Kimora Lee Sim­mons-i Jewellery Company (Simmons Jewel­lery) nen kum 2005 khan inremna siamin an thawk dun a, High End Jewellery (Lunghlu manto leh Rangkachak leh Silver ṭha mi) siamchhuah hna an thawk dun. Hello Kitty design hmangin ṭhi, bengbeh, ngun, bracelet leh zungbun te an siam chhuak a, aman pawh a toin, mi nazawng pawhin an nei phak lo a ni. Mi nawlpuiina an neih theih tur siamchhuah ṭhain an hria a, kum 2008 thlasik a lo thlen meuh chuan dollar 50 man lek leka lei theih turin SJ Company-te chuan an rawn siamchhuak leh ta a ni.
Incheina thawmhnaw chauh a ni lo, kum 2006-ah chuan electric guitar siam­chhuaktu company lian Fender US nen ṭangkawpin Hello Kitty Stratocaster Guitar an siamchhuak ve leh. Heng bakah hian Taiwan-a khawpui pakhat Yuanlin-ah chuan Hello Kitty nau neihna hospital din hial a ni a, blanket leh bed sheet leh nurse uniform-ah te Hello Kitty ziarang hmuh theihin an pholang a ni. Heng bakah hian Hello Kitty ngainatute tan theme park lian tham tak Harmonyland leh Sanrio Puroland te buatsaih a ni bawk.
South Korea lamah pawh a tla na hle a, thawmhnaw dawr mai piah lamah Kitty Cafe chu Seoul hmun laili takah din a ni nghe nghe. Hei mai hi ni lovin Hello Kitty hmingchawia Air Bus A330-200s leh Eva Air Hello Kitty Jet 777 te pawh hmuh tur a lo awm ta zel a ni. Tlema upa lam zawkte hamṭhat vena turin a in lam chi, wine te pawh online-a lei theih turin an siamchhuak leh zel bawk.
Incheina khawvelah pawh hnuhma leh sulhnu hmuh tur a awm chho dawn chauh niin a lang. Japanese designer ho pawhin idea neih nan tak an hmang chho zel a, Yamamottos, Japanesse designer lar tak phei chuan thawmhnaw mai piah lamah Adidas com­pany nen inzawmin Hello Kitty footwear edition an siam­chhuak nghe nghe. Heng bakah hian pheikhawk company lian Vans nen pawh June 2011 aṭang khan thawk dunin tleirawlte duhzawng tak tur leh ṭhalai mil tur tak mai Hello Kitty lem chuang an siamchhuak leh zel a ni. Tlema dangdai deuh hlek turin Gothic lam rawngkai deuhin Novalatakimotto chuan Hello Kitty a duang chhuak bawk a, heng bakah hian khawvel designer lian Dior collection, John Galliano duan chhuah ho zingah Hello Kitty hi runway-ah a telh ve nghe nghe. Heng bakah hian forever 21 nen ṭangkawpin November ni 18 aṭang khan hmeichhe line an siamchhuak dun leh ta bawk. Blue Girl, Elie Saab, Immanuel Ungaro, Manish Arora, Marchesa leh designer ṭhahnem tak chuan Hello Kitty nen ṭangdunin thawmhnaw nalh tak tak an lo siamchhuak fo tawh bawk a ni.
Heti fakauva lar leh mite ngainat a hlawh chhoh takah chuan Hello Kitty convention te hial buatsaih a ni ta a, khawvel hmun hrang hrang aṭangin Kitty ngainatute'n an duh dan taka incheiin November 2014 khan Los Angeles-ah he Convention hi an chhim nghe nghe a ni. Hei mai ni lovin a kum sawmli tlin lawmna chu Kuala lumpur, Malaysia-ah ropui takin ni thum chhung lai mai buatsaih a ni a, he anniversary denchhen hian fashion shows leh concert leh intihhlimna leh inelna chi hrang hrang buatsaih a ni bawk. Heng aṭangte hian incheina khawvela Hello Kitty-in a thawh hlawkzia kan hmu thei awm e. Zawhte lem satliaha kan ngaih kha fashion khawvela thawhhlawk ber pawl a lo ni reng mai a, kan la uar chhoh zel pawh a rinawm.

Tluangpuii Hmar

Instructress,

Vakiria Institute of Fashion Technology