Chhandamna Sipai Pawl kum 150-naah Mizo Singers ten lawm an hlawh

July 1-5 chhung khan Salvation Army chuan kum 150 a tlin lawmna, Boundless Congress 2015 London-ah an nei a, Mizoram aṭangin Mizo zaithiam, Sipai Pawlin a din, Mizo Singers te an zai a, an rawngbawlna pawhin hlut a hlawh hle.

Boundless Congress 2015 hi khawvela hmun hmingthang, O2 Arena-ah neih a ni a, hetah hian Mizo Singers-te an kal a ni. Mizo Singers te hi India Eastern Territory chhunga Sipai Pawl-in standing choir a neihsa pali aṭanga din a ni. Member 24 an awm a, Songster Leader-ah Mizo Idol judge hlui R. Lalremruata niin, Deputy Songster Leader-ah Henry Lalmawizuala, Mizo Idol judge ṭhin tho bawk leh Isaac Lalthanmama te an ni. Nikum 2014 May thla aṭang khan Mizo Singers te hi Boundless Congress atan hian an inpuahchah ṭan a, 2015 June thla tawp thleng an theihtawpin he khawmpui atan hian an inpuahchah a ni.

An hla zir dan hi a hautak ang reng hle a, member pali te hi Western Division Songster-a mite an nih avangin Kolasib aṭangin hla zir turin Aizawlah an kal ṭhin a ngai a, mahse harsatna lutuk awm loin an rawngbawlna an hlen ṭha hle.

Boundless Congress-ah hian Mizo Singers te hian hla vawi sawmhnih vel an rem. Boundless Congress ah hian Session 1 atanga Session 7 a awm a, hei bakah hian International Officers Council a awm a, zan tin, Session banah Late Night Alive a awm ziah bawk. Mizo Singers te hi International Officers Council-ah an zai a, Session 1 ah leh Session 4 ah an zai bawk. Late Night Alive-a an zai mai bakah, anmahni pualin darkar khat chhung Cineplex Screen 7-ah concert an buatsaih bawk. Session 4 bikah hian Pathianin a hman em em, worship hla ropui “How great is our God” tih chu zaipawl dang Amsterdam Staff Songster leh New York Staff Band te leh classical singer Ayoung Lee te nen saho tura tih an ni a. He hla hi Khawvel ṭawng hrang hrang zingah ṭawng chi nga velah leh niin, Mizo Singers member Zorinpuii chu solo part an laktir a, Mizo ṭawng ngeiin hma a hruai. Session 4 ah vek hian “Psalm 91” an sa leh a, he hla an sak chhung hian ballet dancer lar tak, Shaw Coleman leh Hart Triplets an lam a ni. Mizo Singers te hian anmahni pualin Concert darkar khat chhung an buatsaih a, he an concert-na tur ticket hi nikum December 2014 khan an lo hralh zo vek tawh a ni.

Session 6-a Youthful Army programme, July 4-a an hmanah Mizo Idol aṭanga kan hriat lar, Judith chuan 'Worthy is the Lamb' a sa a, hengte nen hian Judith-i hi vawi thum lai a solo.