Sawmtea video pathumna a peihfel
Kumin Mizo album chhuak tur zinga ṭha ber pawl tur, Lalremruata (Mapuia) hla phuah dah khawmna, Project 2015-a hlate peihfel chhoh mek a ni a, he album-a hla zinga mi, Sawmtea sak 'Kristan min tlan chhuak ta' music video chu Sawmtea'n a peihfel a, mipui hmuh theih turin dah chhuah a ni leh ta.
Project 2015-ah tunlaia zaithiam lar ber berte'n Mapuia hla phuahte hi an saksak a, Sawmtea bakah hian Lancy, Hlumawii, Feli Thangluah, PBKA, Lawmawma, VLA leh Essy te an zai a, Bethsy leh Pensy te hla tur pawh buaipui chhoh mek a ni.
'Kristan min tlan ta' tih hla hi Sawmtea'n kumin music video a tihchhuah pathumna a ni. Sawmtea chuan, "He hla hi a nalhin a hot a, sak a nuamin a thluk a mawi hle. Ṭhalai leh naupang zawk te'n an duh viau ka ring....a music leh thluk a tunlai khawp mai," a ti. Tuna mi nen hian Sawmtea hian music video single hi pasarih lai a tichhuak ve ta a ni. Sawmtea hian hei bakah hian music video dang tihchhuah tura hmachhawp a la nei nual bawk.
Sawmtea chuan, "A chang chuan chhun lamah te programme a lo awm ṭhin a, chutiangah chuan harsatna awm miah loin ka tihlawhtling thei a, ka thawhpui, Blood Bank doctor-te leh staff te chungah ka lawm hle a ni," a ti.