Fan-ten music chhuak thar an duh ber XG 'GALA'

Billboard-in kar hmasa chhunga rimawi chhuak thar zingah Japanese girl group XG single thar 'GALA', runway anthem tih bawk chu fan-te duh bera thlan a ni. 'GALA' hi kar hmasa Zirtawpni khan tlangzarh a ni a, music video hian 2 million view a nei tling der tawh bawk.

XG hi kum thum liamta khan rimawi khawvelah an rawn lut a, kumin hian album tihchhuah an tum niin an tarlang bawk. Poll-ah hian Cardi B, RAYE, Miley Cyrus, leh Lola Young-te an khum a, 'GALA' hian vote tla zawng zawngah 65% a hmu pha a ni. Cardi B 'Am I the Drama' chu pathumnaah awmin vote 3.55% a hmu pha a, RAYE 'WHERE IS MY HUSBAND' chu vote 0.98% hmuin palinaah a awm a, Miley Cyrus 'Secrets' chu vote 0.75% hmuin pangana a ni ve bawk. Poll-ah hian dah lan zinga duh nei lo te thlan ṭhin 'Others' chuan vote 28.93% hmuin pahnihna a ni thung.