Britain-a model hlawh hnem ber Cara Delevingne

The Sun chanchinbuin a tarlan dan chuan Britain-a model hlawh hnem ber chu Cara Delevingne a ni a, nikum chhung khan £maktaduai 15.7 a lalut niin an tarlang.

Kum 28 mi model leh lemchan thiam ni bawk hausak zawng hi £mtd 30.2 vel nia chhut niin nikum chhung ringawt khan a hausakna chanve vel hi a thawk chhuak tihna a ni. 

Brand lian tak tak- Burberry, DKNY, Jimmy Choo, Rimmel leh Volkswagen-te nena an thawhdunna chu a sum lakluhna pawimawh nia tarlan niin a modelling career bakah a lemchanna aṭanga a sum lakluh pawh a tam tham hle nia tarlan a ni bawk.

Kum 2012 leh 2014 khan Cara Delevingne hi British Fashion Awards-ah Model of the Year atan thlan a ni a, kum 10 mi lek a nih laiin a modelling hna hmasa ber chu a thawk a ni. Kum 2009 khan Storm Management nen inremna an ziak a, kum 2011-a  London Fashion Week-ah khan a ṭum khatna atan  catwalk-in a inlan hmasa ber a, hemi ṭum hian Burberry Prorsum A/W collection tan a walk a ni.

Music lamah pawh sulhnu a nei nual tawh a, a zaithiam bakah drums leh guitar a play thiam. Kum 2011 leh 2012 khan album pahnih lai a tichhuak nghe nghe a, a hming thlak a duh loh avangin record deal-te pawh a lo hnawl hial tawh. 

Kum 2017 khan lehkhabu Mirror, Mirror pawh a lo tlangzarh tawh bawk a, talent a nei ngah hle a ni. Lemchan lamah chuan DC film lar tak Suicide Squad-ah khan a inlan a,  London Fields leh film dang eng emaw zatah a inlan tawh bawk a ni.

English model chuai thei lo, kum 46 lai ni tawh Kate Moss chu Britain model hlawh tam ber dawttu niin nikum chhung khan £mtd 9 a la lalut thei a ni. Kum 33 mi, model bakah lemchan thiam ni bawk, Transformers actress Rosie Huntington-Whiteley chu sum lalut tam pathumna a ni a, £mtd 8 sum a lalut a ni.

Naomi Campbell chuan £mtd 5 lalutin sum lalut palina a la ni phak a, kum 30 mi Jourdan Dunn chuan £mtd 2.2 lalut ve bawkin top 5 a rawn khar thung.