Gibson kutah Mesa/Boogie

Guitar manufacturer lian Gibson chuan amplifier brand lian Mesa/Boogie chu an kutah a awm tawh tih kar hmasa Nilaini khan an puang.

Mesa/Boogie hi kum 1969-a Randy Smith din a ni a,  Carlos Santana, Ron Wood and leh Keith Richards (The Rolling Stones)-te chu guitarist lar zinga a amplifier hmang hmasa pawl an ni. Mesa/Boogie MESA Engineering hi tube amplifier technology-ah chuan hmahruaitu nia ngaih niin kum 1991-a Dual Rectifier Solo Head amp an siam chhuah hnu phei kha chuan amplifier company zingah dahsan an hlawh lehzual hle.

Tunah erawh Gibson kutah an awm ta a, Randy Smith hi master designer angin a la awm chhunzawm dawn thung a ni. Gibson Brands president leh CEO James "JC" Curleigh chuan kum 100 vel liam ta a Orville Gibson-a'n bul a lo ṭan tawh chu chhunzawm zel niin tunah chuan chu zinkawngah chuan Mesa Boogie chu Gibson chhungkuaah an tel ve ta a ni, tia sawiin, Randy Smith leh a team, hmathlir nei ṭha tak takte nena an thawhhona tur chu thawhhona duhthusam a nih thu a sawi.

Brad Delson, Pete Townshend, Andy Timmons, Mark Knopfler, Dave Grohl, James Hetfield, Kirk Hammett, Cliff Burton, David Gilmour, Kurt Cobain, John Petrucci, John Myung leh Mark Tremonti-te pawhin Mesa Boogie amp hi an hmang ṭhin a ni. Gibson hi chu kum 1902-a Orville Gibson din kha niin vawiin thlenga guitar siamtu company lar ber zinga mi an la ni reng a,  Gibson Les Paul phei chu khawvela guitar hralh tam ber zinga mi a ni.