'Luah loh lungdi nghilh ni awm lo' music video thar a chhuak

Mizo lêngzêm hla hlui lungrun tak mai, 'Luah loh lungdi nghilh ni awm lo' tih hla Ngopa Welfare Committee, Aizawlin music video an siam thar chu nimin khan MJA president C Lalrambuatsaiha'n Aizawl Press Club-ah a tlangzarh.

'Luah loh lungdi ' tih hla hi tun hma aṭanga hla lâr em em mai a ni a, zaithiam lâr tak tak - H Lalchawimawii, Vanlalruati leh Vanlalhlana te bakah, zaithiam dangte'n an lo sa tawh ṭhin a, music video siam pawh an awm nual tawh. Ngopa Welfare, Aizawlin music video an siam tharah hian Youth Icon lo ni tawh H Lalrempuia'n mawi takin a sa a, music video changkang taka siam niin, a hla thuin a tum ang thei ber tura siam a ni.

'Luah loh lungdi' tih hla hi zirlaibu-ah pawh telh a lo ni tawh ṭhin. A phuahtu chungchangah hriat dan inang lo a awm a; ṭhenkhatin Darchhunga Hrahsel an ti a, ṭhenkhatin Lalzova niin an hria a, ṭhenkhatin Vankhama an ti thung. Ngopa Welfare Committee chuan Darchhunga Hrahsel phuah ngei nia an hriat avangin music video an siam thar leh ta tih an sawi.

Ngopa Welfare tarlan danin, Darchhunga hian a láwmnu Tlangsawithangi (Thangi Vanchhawng) puala a phuah a ni. Kum thum lai an inlàwm tawh hnuah Thangi chuan a thihsan hlauh mai a, Darchhunga lungleng lutuk chuan 'Luah loh lungdi' tih hla hi a phuah ta a, kum 1925 emaw, 1926 emawa a phuah nia ngaih a ni. Darchhunga hian cháng hnih chauh a phuah a, a cháng dangte chu mi dangin an phuah belh nia ngaih a ni. Music video siam thar hi Darchhunga phuah chin chauhah hian siam a ni.