G20 YEA Startup Pitch Battle Top 5-ah Mizo nula a lang

G20 Young Entrepreneurs’ Alliance (G20 YEA) Summit chu September 16-20 khan Johannesburh, South Africa ah neih a ni. Summit-a G20 ram aṭanga entrepreneur te inelna - Startup Pitch Battle buatsaihah Mizo nula, Lalrinngheti Sangsiama chu Top 5-ah a lang pha.

Summit hi kumtin G20 Leaders’ Summit thlen hma deuhah neih ṭhin a ni a, India ram aiawhin Confederation of Indian Industries (CII) hnuaia Young Indians aṭangin palai 37 an kal a; Young Indians, Mizoram Chapter aiawhin mi pathum: Alan Lalhriatpuia, Francis L Khiangte leh Lalrinngheti Sangsiama te an tel. Kumin thupui atan "Solidarity, Equality, and Sustainability" hman a ni a, ram hrang hrang inunauna, hmasawnna tlo leh chenfakawm thlen theihna tura thawhhona chungchang thlur bing a ni.

G20 YEA hi khawvel pum huapa entrepreneurs leh entrepreneurship promote-tu pawl hrang hrang inzawm khawmna a ni a, kumin summit-ah hian G20 ram aṭangin palai 600 chuang an kalkhawm. Ram hrang hranga entrepreneur te'n in sumdawn tawnna leh thawh hona ṭha an neih theihna atana pawimawh, G20 a tel ram tena an ram policy an her remna tur leh siamṭhat theihna laite sawi ho a ni a, insumdawn tawnna ṭha zawk nei turin thuthlung pawh ziaka dah a ni.

Summit-ah hian G20 ram aṭanga entrepreneur-te inelna - Startup Pitch Battle buatsaih a ni a, a ṭha zual pariat thlang chhuakin palai kalkhawmte hmaah inelna an nei leh. He intihsiaknaah hian Mizo nula, Lalrinngheti Sangsiama telin, a product/mobile application a siam Treaxures chu Top 5-ah a lang pha a, judge leh palai hrang hrang ngaihven a hlawh hle.