'Simpsons' movie sequel nakkum nipuiah

American animated comedy, 'The Simpsons Movie' sequel chu Disney 20th Century-ah official-a siam mek niin, July 23, 2027 hian theatre-ah tihchhuah a ni dawn. Feature film hmasa 'The Simpsons Movie' kha July 2007-ah tlangzarh niin, global box office-ah USD mtd 536 a la lut pha a, a chhunzawmna chu kum 20 hnuah kan hmu leh thei dawn ta a ni.

Film hi Marvel project, studio-in a hnawl leh tak aiah siam a ni dawn a, Disney leh 20th Century chuan a plot kimchang hi an la puang lo. Matt Groening-a siam, 'The Simpsons' hi television-a animated series leh sitcom tihchhuah rei ber niin a season 40-na pawh kum 2028 leh 2029-ah tihchhuah a ni dawn. Simpson chhungkua - Homer, Marge, Bart, Lisa leh Maggie-te chanchin tarlanna a ni a, en a la hlawh hle.