Zaninah Sound From The Hills-te'n Liandoa bur chhete an tum dawn

"Fianriala Mizo, Liando Dár bâk lungkham nei lova lungawi leh thlamuang taka awm chuan, amah rawn chîm thuttu Sâp leh Vai culture tuifawnah a pil dawn ṭêp tihah, dár zawng zawnga dár huai ber, Liando Dár neitu a ni tih a inhmuchhuak a. Chu dár chu huai taka dinchhuahpuiin, khawvel rimawi zawng zawng fâwkkhâwmna leh famkimna dárah a chantir a tum ta zawk a ni," tiin script ziaktu Vanneihtluanga chuan a sawi a, eng lam hawi film nge a nih dawn heta ṭang hian a hriat thiam nghal mai awm e.

Boomarang guitarist Boom Boom-a te band Sound From The Hills-te'n Liandoa bur chhete thiam taka an tumna musical film chu zanin dar 8-ah hian Zonet Zawlbukah leh Zonet YouTube channel-ah thlira ngaihthlak theihin a awm dawn. Rimawi khawvelah khawthlang thlipuiin kum tam tak min nuai tawh a, tunah khawchhak lungpui lian rawn lumin min delh leh mek bawk a, chutiang karah chuan Sound From The Hills band, Zonet leh Lily Veng Cultural and Drama Club ṭangrualin kan Mizo rimawi mu mek tawh min rawn kaihthawh sak leh dawn niin a lang a, tunlai ṭhalaite ngainat zawngin an rawn her rem dawn a nih hmel bawk a, Mizo hmasang rimawi, hla do chham leh  zai chi hrang hrang kan neihte chu tunlai rimawi mawi tak takte nen an rawn chawhpawlh dawn a; a ngaihnawm ang, beng a tlai bawk ang.

Zanina chhuak tur Musical film-ah hian C. Luri zai tawite ngaihthlak tur a awm dawn a, G'nie rap ngaihthlak tur a awm dawn bawk. Esther Hnamte-in a aw a thawh dawn bawk. Indian Classical Section a awm dawn a, chu chu Sucheta Bhattacharjee kut chhuak a ni ang a, Azadi Section awm dawn bawkin hei hi Rahi Sayeed Umair kut chhuak a ni bawk ang.

Liandoa te unau Mizo Musical film hi a rei dawn lo a, minute 15 vel bak a ni dawn lo a, mahse he hun chhung hian thil tam tak kan hmu hman dawn. Mizo darbu chawisan tumna play a ni dawn niin Vanneihtluanga Facebook post chhiartute tan chuan a ngaih theih ang a, rei lote chhungin rimawi mawi tak tak, show hmuhnawm tak leh Mizo hla hrang hrang an kaikhawm dawn a ni ber mai. Mizo Hla Hlui, R.L Thanmawia tihchhuah leh Mizo Dar Hmingthangte, C.Lalaudinga tihchhuahte behchhanin an hla rawn zehte hi an siam a- Lalvunga Zai, Bawh Hla,  Dar Hla, Aikhiangi Zai (Chai Hla), Sakhaw Thiam Hla leh Sanghal Hla Do-te ngaihthlak tur a awm dawn a ni.

Frederick Lalduhawma                        Vocalist, Lyricist, Composition, Asst. Co-Producer

Rothangliana Ralte                                Acoustic Guitars, Keyboards, Composition, Co-Producer 

Booma Hangsing                                Electric Guitar , Composition, Executive Producer

Buanga Sailo                                        Bass guitar, Composition, Producer

Tetea V anchhawng                            Raw Chhem, TuiRi, Phenglawng (Mizo Folk Instruments), Composition

Lalchhandama Bawitlung (LB King)    Electric Guitars, Composition

Sunny Manbha                                    (Tribal Drum Rhythm Section)

Mamawia Colney                                Drum Orchestration 

Bame Ryntathiang                                Piano

Alfred Sailo                                            Tribal Music Researcher, Writer, Lyricist, Narration, Vocals

Vanneihtluanga                                    Music Direction, Video Script, Dialogue, Vocals 

Munish Singh (ICCR)                            Music Direction, Band Representative