Ṭhazual Fakna-ah Zorinsanga Sailo 'A Hmangaihna aw' pakhatna a ni
Ṭhazual Fakna chart-ah Zorinsanga Sailo 'A Hmangaihna aw' chu pakhatna a ni a, Sawmtea 'Lalpa I Chawimawi Ang' chu pahnihna niin Baby Malsawmtluangi 'Ka Kawng Hruaitu' chu pathumna a ni.
'A Hmangaihna aw' a mawi ber
Zonet Ṭhazual Award 2020-a Best Male Artist Gospel award dawngtu Zorinsanga Sailo hian 'A Hmangaihna aw' hi thla thum vel liam taah khan a rawn tichhuak a, music video hmuhnawm tak nen rawn chhawp chhuakin Ṭhazual chart-ah hian a mikhual tawh lo hle a ni.
Top 3-a a inlanna phei chu a rei leh deuh tawh a, Chart hmasaah khan pahnihna niin tunah chuan dinhmun ṭha berah a rawn inhlangkai ta a, he hla hi a mawiin music video a uluk bawka pakhatna nih pawh hi a phu hle.Paul Lalremsanga hla phuah hi ngaihthlak a manhla a, Zorina hian a sa thiam bawk nen a dinhmun hi luah chhunzawm leh pawh nise a mak lo ang.
Sawmtea'n hma sawn zel
Sawmtea Chhangte hla 'Lalpa I Chawimawi Ang' chu pahnihna a ni a, ani pawh hi Ṭhazual fakna chart luahlum bertu zinga mi niin pakhatna ni thei turin a dinhmun a rawn sawh nghet zel a ni. Baby Malsawmtluangi 'Ka Kawng Hruaitu' chu pathumna a ni thung a, chart hmasaah khan palina niin hma a sawn zel a ni.
Top 5 khartu Faktu
Sailo Lalsangzuali 'Tuining Lui' chu palinaah a rawn inhlangkai ve leh ta bawk a, Gospel band Faktu 'A Awm Tawh Lo' chuan Top 5 a khar a ni. Top 10-ah hian Lalthlengliani, Stacy Punte, One in Christ, Zualtei leh Cindy-te pawh an lang.