MZI bultumin Aizawlah ṭhalaite'n Thlahleinga Zan an lâwm

Nizan kha kum khat chhunga thla ên ber zan, Arkaiden Zan / Thlahleinga Zan a ni a, he zan lunglenthlak bik pual hian Mizo Zaimi Inzawmkhawm (MZI) Gen. Hqrs chuan Aijal Club Park-ah Arkaiden Zan an lâwm. Mizoram Journalist Association (MJA) general secretary K. Zothanpara chu khuallian niin a hmanpui a ni.

Arkaiden Zan puala MZI-in hun an hmanah hian mi eng emaw zat an tel a; zaithiam ṭhahnem tak, hranghlui deuhte leh tunlaia mipui hriat hlawh tak takte an che a, hun hlimawm tak an hmang.

MZI hruaitute chuan Arkaiden Zan an buatsaih chhan sawiin, "Kum khat chhunga thla ên ber zan, October full moon, Mizote'n Arkaiden Zan hi hmânlai aṭangin ṭhalaite'n an lawm ṭhin. MZI pawhin Mizo ṭhalaite lawm bik zan a nih avangin lawm ve ngei kan duh. Lungleng taka hmânlai aṭanga an lo lawm ṭhin a nih ang ngeiin tun aṭang chuan kum tin hman ṭhin tawh ni se kan ti a ni," an ti.

Arkaiden Zan hi ṭhalaite lawm bik zan a nih piah lamah, Tourism department leh MZI Gen. Hqrs ṭang dunin October 8-10, 2025 chhunga zan tin Mizoram Travel Fest 2025 'Nostalgia Nite' an hman tur urlâwkna a nih nghal thu an sawi bawk.