MLS FC-in Peka thlak nan Tawia an la

GIG Motors MPL12-ah match hnih chauh khelh tur a awm tawh a, Lawngtlai club MLS FC chuan October 6, Thawhṭanni zan khan coach atan Lalruatliana Sailo (Tawia) an lakluh thu an puang. Southern Blues hian October 4, Inrinni khan coach Vanlalpeka Ralte banna an pawm thu ziakin an tichhuak tawh a, RS Annexe coach hlui Tawia hoa season ṭha taka khar an tum dawn a ni.

Peka sulhnu

Peka hi Lawngtlai football history-a player leh coach ṭha bera chhal ngam a ni a, MPL-a MLS kaipuitu a ni. Lawngtlai club MLS chuan, "Vanlalpeka Ralte (head coach, MLS FC, Lawngtlai) of Lawngtlai III chu MLS FC official group (Whatsapp - MLS Coaching Staff)-ah ama duh thlannain a bang a, hei hi MLS FC Executive Committee Meeting (Emergency) chuan ngun taka a ngaihtuah hnuah a banna hi a pawm ta a ni. Vanlalpeka Ralte chu MLS FC, Lawngtlai head coach a nihna aṭangin a chawl tih kan puang e," tiin October 4, Inrinni khan thuchhuah an siam a, duhsakna an hlan bawk.

MFA Cup leh Lunglei Super Cup-a Southern Blues champion puitu Peka chuan, "Hahdam ve rih ka duh a ni," tiin Vanglaini a hrilh. MLS hian match hnuhnung panga aṭangin point 11 an hmu a, MPL12-ah point 14 hmu tawhin semifinal lut thei dinhmunah an la ding.

Target top 4

MLS FC coach thar Tawia chuan, "Match li chauh khelh tur a awm tawh a, ka tan chuan chona lian tak a ni. Team hian tum a nei sa a, a sang palia khelh kan tum. Lawngtlai club-in semifinal an khelh theih nan theihtawp ka chhuah ang," tiin Vanglaini a hrilh. Southern Blues hian an chunga awm Aizawl FC leh Dinthar bakah an hnuaia awm SYS FC leh Mizoram Police te an la hmachhawn dawn.

Aizawl pawn club tan MPL khelh hi a harsa a, Reitlang FC-in season nga chhung an daih. Chutihrualin Reitlang FC pawh hi an season hnuhnung pahnihah chuan Zo United tiin an hming an thlak a, Aizawl club anga chhal theih an ni tawh thung.

MPL-a Aizawl pawn aṭanga club dang inlan tawh Lunglei FC leh Kolasib club Project Veng FC ten season khat bak an daih lo a, Lunglei club SYS FC-in season hnihna khel mekin match 10 aṭanga point khat chauh an hmuh avangin relegate thei dinhmunah an ding mek. MLS erawh semifinal khel thei dinhmunah an ding a, knockout an thleng thei a nih chuan Aizawl pawn club aṭanga semifinal khel thei hmasa ber an ni ang.