Fashion Fiesta Pyjama

Mizote hi mite tihdan entawn ching tak mai kan ni a, incheina a ni emaw changkanna kawngah midang tihdan kan entawn fo ṭhin. Hetianga mi style copy reng renga mi tam zawk kan hmanhlelh lai hian zofate zingah mi tlem te mahni style-a kal ngam leh inbel ngam kan nei. Tun ṭum chu Mizo hmeichhe zinga inchei thiam leh dangdai thei em em mai, ka ṭhian duh tak Rosy K. Remsangpuii thlavang kan hauh ang e.

Tunkar chhoa khawthlang rama kan unau zaithiam lar tak mai rawn kal ṭuma kan zaithiam chhuanvawr, Zofate min tihming ṭha tura kan theh chhuah Rosy inchei dan chuan sawi a hlawhin, mi tam zawkin a mut kawr a rawn ha chhuak tiin an sel luai luai anih kha maw. Ni e, a dik alawm. Mizote chuan mut kawr kan ti mai a, a sap ṭawng taka Pyjama suit kan tih ho hi anihna takah chuan inchei nan mi tam zawk hian kan inbel miau lo a, sawisel emaw, man phak vak lo pawh kha ‚wm tak a ni. Amaherawhchu, tlema fashion-a hmahruai deuh ho chuan kan hre awm e. He Pyjama suit hi kum zabi 18-na chho daih tawh khan incheina thuam pakhat a ni daih tawh.

A dik a dik chuan fashion-ah hian khatih hunlai
aṭang tawh khan a lut chhuak reng a, kum zabi 17-na chhoa British Kumpinu Sorkarin India ram min rawn luh chhuah a, min awp aṭang daih tawh khan India ram chhunga lal leh mi challang zawk ten kawrchung leh kekawr in-suit an hak ṭhin, Persian ṭawng aṭanga an lak chhawn, Peyjameh tih aṭanga he ṭawngkam hi lo chhuak a ni a. Khang hunlai khan lonei mite leh mi challang leh neinung zawk ten a suit-in an inbel ṭhin a,uniform ang deuha hak pawh a ni ṭhin. A puanthan an hman dan azirin mi hausa leh mi hnuaihnung an hriat hran theih thung. Khang hunlaia Mosolman mipa ten kekawr thawl, hak nuam tak, a k‚wnga suihna awm an inbel dan style chu entawnin British mite chuan anmahni ram ngeiah chumi zulzui chuan thawmhnaw an duang chhuak ta a, vawiin thlenga Pyjama suit kan tih ho rawn pianchhuahna a ni awm e.

Designers zingah Coco, Chanel, Givenchy leh Schiaparelli te a uar hmasa an ni. Chumi hnuah 70s chhoah British designer Ozzie Clarke chuan print leh kaftan leh Pyjama te rawn uar chhuak lehin, khawvelin kan lo hmelhriat chho zel a, kum zabi 20-na kan luh meuh chuan designer kan neih ṭhat ber berte zinga mi Dolce & Gabbana te chuan theme (Italia is love) fashion show collection siamin he incheina, Pyjama suit nalh tak tak hak dan chi hrang rawn an rawn chhawp chhuak a, khawvelin rei tak a lo hmelhriat tawh loh chu rawn ti chhuak lehin, awm hmuna hak tura kan lo ngaih chu incheina tlak a nihzia an rawn pho chhuak. He mite vek hian February thla daih tawh khan Los Angeles-ah Pyjama party siamin Hollywood leh fashion khawvela kei ka ni inti leh milarte an fuankhawm hneh hle a, anmahni tan bika siam Pyjama, PJs tia a hming lam tawi ṭhin chu inbelin, he trend Pyjama suit hi incheina khawvelah an rawn vawrh lar hneh hle a ni.

Tunhnaiah milar hote zingah Selena Gomez-in Derek Rose Pyjama set a rawn inbelte leh Jessica Alba-in nalh tak maia D&G set design par a rawn inbelte chu fashion khawvelah mite sawi hat a tling chho a, a tira Pyjama original tak chu kekawr leh kawr ni mah se vawiin≠ah chuan mi tam zawkin Pyjama tih hian kekawr thawl, loose hneng hnuang hak nuam tak hi kan rilruah a awm tlangpui. Anihna takah chuan design hrang hrang - Capri Pyjama, Beach Pyjama te leh Shorts Pyjama te rawn siamchhuak zelin; chu mai chu duh tawk lovin a par te, a
ṭial te, a spot te leh a tira cotton-a siam ni ṭhin chu silk leh satin-ah te an rawn siamchhuak ta zel a, vawiinah chuan Zoram chhungah ngei pawh fashion lama kan sulsutu zinga mi Rosy thleng pawhin a lo inbel ta a, nalh kan tih zawng a ni lo anih pawhin a tunlai hle. A hatu hian mi tihdan, a Mizopuite inchei dan a entawn lem lo bawk a, originality nei ṭha viauah kei chuan ka lo ngai hmiah mai. He trend hi Zofate zingah pawh a tla na chho viau turah ngai ang.

Dangdai leh tunlaina ang zawnga kan inbel duh anih chuan thu hran, he incheina hi formal leh hnathawhna hmun, smart taka inchei ngai ang chiah chuan inbel loh a ṭha phian ang. Kum 2006 khan Saudi Arabia-ah chuan Government hnathawk te an hnathawhna hmunah Pyjama lam kaihhawih hak khap tlat a ni a, UK-ah ngei pawh Super market
ṭhenkhatah an customer-te heng thawmhnaw inbel chu luh an khap bawk. Office hmun ṭhenkhatah pawh hnathawhnaa customer-te nena indawr ngai ang chiah phei chuan a formal lo tia khapna hmun pawh a awm nual reng a ni. Ni e, a formal lo a, lounge wear kan tih mai, hak nuam,hahdam thlak, awmhmun hak deuh thaw tura duan anih miau avangin ṭhi leh pheikhawk nalh tak, Stilletos a ni emaw high top sneakers te nena inbel kawp anih khan fashion huang chhungah suan luh a ni tih kha hre rengin, tunlai leh nalh tak siin inchei dan i lo thiam dawn nia.

Tluangpuii Hmar

Instructress

Vakiria Institute of Fashion Technology