Zaithiam kum 30 hnuai lamah Taylor Swift a hausa ber

Hei hi chu rin sa a ni tawh. Forbes chanchinbuin hausa chi hrang hrang a tarlanah Taylor Swift, bialpa ṭhen zing deuh hi pakhatna a ni chho char char a, zai≠thiam, kum 30 hnuai lam sum lalut hnem Forbes chanchinbuin a tarlan thara sum lalut hnem ber a ni leh pawh hi a mak tawh hran lo.

Forbes chanchinbu hian zaithiam kum 30 hnuai lam sum lalut hnem a tarlanah Taylor Swift hian USD mtd 170 zet lalutin sum lalut hnem ber a ni. Forbes chanchinbuin a tarlan tawh dang, milar zinga sum lalut hnemah Taylor Swift hi pakhatna a ni tawh a, hmeichhe zaithiam zinga sum lalut hnem ber pawh amah bawk a ni.

Kum 26 mi zaithiam, country music aṭanga pop lama kal thui ta zawk Taylor Swift hian thla 12 chhungin USD mtd 170 zet a lalut a, a sum lakluhna lian tham tak mai chu 1989 world tour kha a ni. He tour-ah hian North America-ah chauh pawh, chhiah leh a behbawma a pek hma hauhin USD mtd 200 vel zet a lalut thei a ni.

Sum lalut hnem pa≠hnihna chu One Direction an ni. Tunah tak chuan music chawlhsan tawh rih mah se, One Direction hian thla 12 chhunga an sum lakluh hi a la tam tham viau. Member zawng zawngte sum lakluh belh khawm hi USD mtd 110 lai a ni a, hetah hian an band anga sum an lakluh chauh chhut loin, One Direction member an nihnaa member pakhatin sum a lakluh zawng zawng pawh an chhut tel vek a ni.

Kum 30 hnuai lam sum lalut hnem tar chhuah≠ah hian futbol thiam, Lionel Messi chu pathumnaah a lang phak. He Argetinian ball pet thiam hian USD mtd 81.5 zet a lalut. Barcelona forward hian a khelhna club-ah hian sum a lalut hnem tho a, chu mai bakah chuan fakna chi hrang hrang aṭangte pawhin sum a lalut hnem hle.

Adele leh Rihanna chu palina leh pangana an ni a, an sum lakluh hi USD mtd 80.5 leh USD mtd 75 te a ni. Justin Bieber chu paruknaah a lang pha a, Jennifer Lawrence chu 12-naah a lang a, kumina album hit zet mai tichhuak thei, Drake chu 18-naah langin USD mtd 38 a thawk chhuak.