Mariah Carey-i'n MusiCares 2026 Person of the Year dawng dawn

American singer-songwriter leh record producer, Mariah Carey chuan nakkum January 30-a Los Angeles Convention Center-a MusiCares neih turah Person of the Year a dawng dawn.

Carey hian kum tam tak rimawi huanga a lo thawhhlawk tawh avang te, Hurricane Katrina leh Covid vanga harsatna tawkte chhawmdawlna a pek bakah, midangte tan a luanchhuah nasat avangin chawimawina hi hlan a ni dawn. Fresh Air Fund nen thawkdunin, ṭhalai chan chhia leh hnuaihnung zawkten hriselna leh zirnaah hma an sawn theihna turin Camp Mariah a din bawk a ni. MusiCares Person of the Year dawng tawh zingah hian Grateful Dead, Jon Bon Jovi, Joni Mitchell, Dolly Parton, Tom Petty te an tel a ni.