MDM-in zaithiamte hnenah Royalty Rs nuai 2 sem

Music Domain Mizoram (MDM) chuan kumin atana a ṭum hnihna turin an hnuaia zaithiam in ziaklutte hnenah royalty Rs nuai 2 chuang an sem chhuak leh. Donum Dei, Dawrpui Vengtharah October 21 khan zaithiam 32 hnenah royalty hi sem a ni a, kumin May khan zaithiam 40 chuang hnenah sem chhuah a ni tawh bawk.

MDM hnuaiah hian tunlai zaithiam lar chu an awm deuh fur a, member hi mipa 450 leh hmeichhia 445 an awm mek. Hla 3,128 register tawh niin thla tin hla 30 bawr lut ziah ang a ni. Library royalty Rs 2,716,524 leh YouTube royalty Rs 4,353,483 sem chhuah a ni tawh a, hei bakah hian member-te tan medical cell awmin damloh nikhuaa medical bill leh phai refer-te buaipuiin sum pek chhuah ṭhin a ni bawk. Chhiat ṭhata ralna leh lawmpuina mumal takin an pechhuak ṭhin bawk.

October 21-a Royalty dawng tam zualte :

1. Mawimawia

2. Seraphic Choir

3. Zorinzuali Khiangte

4. Zothana ft Zodini Sailo

5. The Radio