Black Friday-ah bazar nan $tld 7.4 hmang ral
Kar liam ta Zirtawpni, Black Friday khan US-a online hmanga bazar-te chuan bazar nan $tluklehdingawn 7.4 zet an hmang ral a, nikum Black Friday aiin sum hman hi 19.6% zetin a sang.
Black Friday hi Thanksgiving tukah hman ṭhin a ni. Kumin Black Friday-a online hmanga product hralh hnem zualte chu L.O.L Surprise dolls, Frozen 2 toys, leh FIFA 20 video game-te an ni. Nikum Black Friday khan US online shopper-te hian $tld 4.2 an hmang a, mahse kuminah an rawn khum nasa hle. Adobe Analytics data-in a tarlan danin November 1 aṭanga Black Friday thlenga online hmanga thil hralh chhuah zinga 34.5% chu smartphone a ni. Hemi chhunga online sale zawng zawng hi $tld 64.5 zet a tling.
Hetih lai hian Thanksgiving Day leh Black Friday dawta Thawhṭanni hmasa ber, Cyber Monday chu vawiin hian hman a ni dawn a, he hun hi kum khat chhunga online shopping nasat ber ni tura chhut a ni. Adobe Analystics chuan vawiin Cyber Monday-a hian online sale zat hi $tld 9.4 a tling pha dawn niin a chhut. Holiday season, November 1 - Dec 31 inkara US-a online hmanga bazar-te thil lei hi $tld 143.8 a tlin rin a ni a, hei hi nikum aiin 14.1% a sang zawk a ni.