Underwood tour a hlawhtling

Billboard-in Hot Tour list a tih-chhuahah Carrie Underwood-i tour chu a hlawhtling ber rih. Carrie Underwood tour, an chhiar hun chhunga mi bik hi November 6 aṭanga 17 chhung kha a ni a, khami chhung khan Ontario, Rockford, Evansville, Memphis, Birmingham (Alabama), Tampa leh Sunrise-ah te a concert. Heng a concert-na aṭang hian USD 4,874,761 a lalut a, a concert entu zawng zawng hi 69,970 an ni.

Concert tour hlawhtling pahnihna chu Rocker chuai thei lo Rod Stewart a ni a, Nov. 14 - 19 chhung khan Belfast leh Dublin-ah concert a nei a, entu mi 32,510 an awm. Concert aṭang hian USD 3,454,060 a lalut.

Five Finger Death Punch leh Shinedown concert hi concert tour hlawhtling pathumna a ni. Oct 31 aṭanga Nov. 17 chhung khan hmun rukah an concert a, USD 2,063,261 an hmu thei. Billy Joel chu palina a ni a, Tulsa, Oklahoma-ah November 11 khan a concert a, seat 17,803 awmna chu an luah khat vek. Concert aṭang hian USD 1,714,920 a la chhuak. Keith Urban chu panganaah a lang pha a, Nov. 11-13 chhung khan USD 1,501,082 lalutin, hmun thumah a concert a, entu hi 25,658 an ni a, seat capacity aiin entu an tam zawk.

Top 10-ah hian Maxwell & Mary J. Blige, Stevie Nicks, Pentatonix, John Prine leh Dolly Parton te an lang.