Leicester Square-ah Bridget Jones lim dah dawn

London-a Leicester Square-ah romantic comedy film series, Bridget Jones lim dah a ni dawn. He lim hi romantic comedy an chawimawina hmasa ber a ni dawn a, kumin November hian Bridget Jones film tlangzarh kum 25 tlin lawmnaah pholan a ni ang.

Bridget Jones hi kum 1996 khan author Helen Fielding chuan siamin, kum 2001-ah big screen-ah tihchhuah a ni. Renée Zellweger chuan Bridget lem a chang a, film franchise palina chu kumin January khan tlangzarh a ni. Leicester Square-ah hian kum 2020 khan lim hi dah ṭan niin, lim pariat dah a ni tawh. Chung zingah chuan Laurel and Hardy, Mary Poppins, Batman, Bugs Bunny, Don Lockwood, Paddington Bear, Mr Bean leh Wonder Woman-te an tel.

Hemi hnu hian Harry Potter, Game of Thrones-a Iron Throne, Clifford the Big Red Dog leh Indiana Jones-te pawh dah belh leh an ni. Kum kal ta October thla khan horror film, Get Out-a Daniel Kaluuya character Chris Washington pawh dah leh a ni.